admin
Johas Moyo
ZISELE zibethwa ngumoya izakhamizi zeZhombe Mission eKwekwe ngemva kokukhutshwa kwenyoka ebibathwalise amagabha avuzayo ngokulala labafazi bonke esigabeni kukanti njalo ibiqeda lamanzi edamu.
Isiga lesi esingundabamlonyeni senzakale kuviki ephelileyo ngaphansi kwenduna uGwesele kusiqinti esikhokhelwa ngusobhuku Makhotha lapho izakhamizi ezacela khona inhlanganiso yeZinatha ukuthi ike izohlahlula isigaba sabo nanko phela kubikwa bekungasalaleki ezindlini isifazane sikhala nsuku zonke ngokwenziwa ucansi yizinto abangaziboniyo.
Kubikwa ukuthi indawo le vele ileziga ezinengi yikho nje sekuze kwacelwa iqula lenyanga ukuthi lizoyilungisa.
Nyakenye kuke kwabonakala inyoka okubikwa yayitshontsha amabele abantu emasimini.
UMthunywa uzwe ukuthi kwabuya abeZinatha abayisithupha abakhupha izinto ezingaqedakaliyo emizini eyedlula eyisikhombisa okugoqela inhlathu eyakhitshwa koMbizo, ukhomane kanye lesandla sendwangu okwakhitshwa emzini kaShadreck Mloyi.
UMthunywa uxhumane loNkosazana Simelukuthula Ntini oyisakhamuzi sakuleyo ndawo oveze ukwethuka lokumangala kakhulu ngebhayisikopo abayibonayo ngesikhathi kukhutshwa inyoka leyo.
“Ngilokhe ngethukile njalo ngitshe amathe ngesiga engasibonayo. Kambe sidubeke kangaka umuntu esilalisa lenyoka yakhe. Khathesi abanye omama balabantwana abakhubazekileyo ngenxa yalinyoka. “Kulabantwana abancane abawela inkanda ngenxa yayo linyoka njalo mhla ikhitshwa kwezwakala umdumo omkhulu,” kutsho uNkszn Ntini.
Intatheli ikhulumisane loMnumzana Zamani Ncube oveze ukuthi wayekhona kusenzakala konke lokho njalo ulokhe edidekile.
“Sabizwa sonke ukuthi sizozibonela ngawethu amehlo bekhipha inyoka le lokunye nje. Inyoka le yathi ikhitshwa abantu bethuka kwathi abanye babaleka. Owayeyithwele wasadalala layo ngoba yayilenkani izama ukubaleka yamphunyuka okwesikhatshana baphinda bayibamba njalo.
“Inyoka le yakhitshwa yahle yatshiswa wonke umuntu ekhangele,” kutsho uMnu Ncube.
Esinye isalukazi esibizwa ngokuthi nguGogo Mbizo okubikwa ukuthi inyoka yaphuma esiphaleni yaso sale semba phansi ukuthi inyoka le ngeyaso.
“Kangali sibili ukuthi inyoka yakhutshwa emzini wami. Lami kwangimangalisa ngoba ngingazi ukuthi ngekabani njalo ukuthi yafakwa ngubani esiphaleni sami,” kutsho ugogo Mbizo.
Intatheli ixhumane loSobhuku uMnu Brighton Makhotha yena ovumileyo ukuthi kwenzakala sibili ukukhitshwa kwenyoka lezinye izinto ezingaziwayo esigabeni sakhe.
“Kuliqiniso sibili ukuthi kulemizi engedlula isikhombisa abeZinatha abakhuphe khona inyoka kanye lezinye izinto ezitshiyeneyo ebezithwalise nzima izakhamizi.
“Zakhitshwa abantu bonke bekhangele zatshiswa njalo bekhangele. Okudanisayo yikuthi abanikazi bezinto bayala ukuthi ngezabo bacatsha ngokuthi kabakwazi ukuthi zafakwa ngubani lapho.
“Khathesi abalande umsebenzi wokukhitshwa kwezinto lezi baphakathi kokwelapha abagulayo lokubethela izikhonkwane kuleyo mizi ukuthi labo abakade beganga bengasali beganga futhi,” kutsho uMnu Makhotha.
Online Reporter