Online Reporter
Patience Ndlovu
SEKUQHAMUKE imlilo yendle efika 216 ngalesi sikhathi sobusika, osekudale ukubhidlizwa kwemvelo engaba kusilinganiso samahekitha angu-71 119.
Kodwa, inani leli lehlile nxa kuqathaniswa lakumnyaka odluleyo, lapho okubikwa izehlakalo zomlilo wasendle ezingu-1 620 ezatshisa amahekitha afika 393 183.
Imlilo le ivame kusukela ngenyanga kaNtulikazi kusiyafika uMfumfu. Ukuqhamuka kwemlilo yendle sekukhathaze ugatsha lwe-Environmental Management Agency (EMA), ebika ukuba ibhidliza imvelo iphinde iphazamise impilakahle.
Umaneja wezokukhitshwa kwembiko lokufundisana kugatsha lwe-Environmental Management Agency u-Amkela Sidange, uthe isizatho sokwehla kwemlilo yendle lonyaka yikuthi kube lezulu elinengi njalo baqhube imfundiso ejulileyo yokwenqabela imlilo lokunakelela imvelo.
Indawo ezihlaselwe kakhulu kuseMashonaland Central, Mashonaland East, Mashonaland West, Midlands leManicaland. Izigaba ezibaliswe ukuthi zihlaselwe kakhulu kuseNyanga, Mutasa, Makoni, Mutare, Chipinge, Chimanimani, Marondera, Chirumanzu laseGweru.
Kubikwa eMashonaland West kube lezehlakalo ezingu-138 (64,29 phesenti), kulandela indawo lapho okugcinwa khona inyamazana (20,79 phesenti) lasemaphandleni (6,36 phesenti).
USidange ukhuthaze umphakathi ukuthi ulondoloze imvelo.
“Ugatsha lwethu luqhubeka ngokukhuthaza abantu ukuthi balondoloze imvelo, benqabele ingozi yokulumatha komlilo wendle.
“Nxa kumele kutshiswe, kasilandeleni indlela lezicebiso ezifaneleyo ukwenzela ukuthi kungabi lengozi.
“Sikhuthaza ukuthi kubekwe ama-fireguard, kuqunywe utshani lezihlahla ezincinyane, kutshenziswe ama-fire beaters le-knapsack spray.”
