Online Reporter
INTOMBAZANA eleminyaka emibili itshone ngemva kokuhlaselwa yizinja zohlobo lwe-Boerboel ngakibo eDouglasdale eBulawayo ngoMgqibelo ekuseni.
Isikhulumi samapholisa koBulawayo, uInspector Nomalanga Msebele uqinisekise lesi sehlakalo wathi umntwana utshonele esibhedlela seMpilo Central Hospital.
Uthe lumbiko ufike endlebeni zamapholisa ngemva kokwedlula emhlabeni komntwana.
“Amapholisa akoBulawayo aqinisekisa ukuthi athole umbiko wokufa okubuhlungu okwenzakale eDouglasdale, koBulawayo, lapho umntwana oyinkazana alunywe ngama-Boerboel walahlekelwa yimpilo yakhe.”
U-Insp Msebele uthe umntwana lo ubehamba lonina oleminyaka engu-31 ngesikhathi uyise oleminyaka engu-41 esipha izinja ezine zohlobo lweBoerboel ukudla phakathi kweguma labo elivalekileyo.
Uthe izinja zeqe phezu kocingo, zagijima zisiyahlasela umntwana.
Ngokutsho kukaInsp Msebele, umntwana lo ulimele kakhulu, okugoqela amanxeba ekhanda lasekucineni kwendlebe, ngaphansi kwamakhwapha kanye lesenyaweni.
“Umntwana ugijinyiselwe esibhedlela seMpilo Central Hospital lapho afike walaliswa khona andubana edlule emhlabeni.”
U-Insp Msebele uxwayise abanikazi bezinja, ikakhulu labo abafuye izinja ezinkulu loba ezingaba yingozi, ukuthi baqinisekise ukuthi amaguma abo abiyelwe kuhle ukuze izinja zingeqi phezu kocingo loba zibaleke. —Ubulembu
