adminCharity Moyo
KULENINA leSamlodi eGwanda elizilumathise ngomlilo lafa ngemva kokuxabana lomkalo obelisola ngokungathembeki emtshadweni wabo.Isiga lesi senzakale ngoLwesithathu kuviki ephelileyo.
Umuyi uNozipho Ntuli obeleminyaka yokuzalwa engu-32, ukhethe ukuzibulala ngendlela le ngemva kokuxabana lomkakhe uEdcar Nyoni.
Kuvele ukuthi ababili laba baxabana ngesikhathi uNyoni ecabangela ukuthi umkakhe uyajola kungakho wasesithi ngeke enelise ukuhlala lomuntu ongathembekanga.
Umfakazi obikele intatheli uMnumzana Nkosenhle Dliwayo uveze ukuthi izithandani lezi besezilomnyaka zixabana ngodaba lolu. Uveze ukuthi ababili laba bebengahlali bonke ngakho ukuthembana kwabo bekunzima ngoba omakhelwane bebehlala bekhuluma izinto ezingaqondanga ngoMaNtuli kumkakhe.
“Besekulomnyaka ababili laba behlala besilwa, uNyoni esithi uhlala ethola imilayezo esemsebenzini wakhe ukuthi umkakhe uyajola ekhaya.
“Lokhu kwacina kubangela ukuthi ababili laba bahlale bengabaxabanayo iloba nje uNyoni wayengakaze amkhande esenza ukuganga lokhu owangakwakhe,” kutsho uMnu Dliwayo.
Kubikwa ngelanga uMaNtuli azibulala ngalo babexabane lomkakhe. Lokhu kwacina kusenza ukuthi uNyoni avuke ephosela impahla zikamuyi phandle wathi kabuyele kibo.
Kuvele ukuthi uNyoni eqeda ukwenza lokhu waphuma waqonda ezitolo efunga ukuthi kafuni kumfica emzini wakhe.
UMaNtuli wathi ebona kungaselamuntu endlini wathatha iphethulo wazithela emzimbeni wasezilumathisa ngomlilo. Wagijima waphaphatheka iguma lonke elokhu esitsha waze wawela phansi.
Onguye owabona ukuthi uMaNtuli usekhethe ukuzibulala, uNkosikazi Sipho Sibanda uthe wathi esizwa ukuthi kulomuntu obubulayo wagijima wafica esetshe umzimba wonke njalo engasakhangeleki.
Uthe waphaphatheka wayabiza omakhelwane kodwa ngokuswelakala kwenhlanhla wayesedlule.
“Ngezwa umuntu ebongolela ngagijima ngiqonda khona kodwa ngamfica evele esengamalangabi umzimba wonke, ngapha ebubula kuphela,” kuveza uNkkz Sibanda.
UMthunywa uxhumane lemuli yakoNtuli yona eveze ukuthi ilahlekelwe kakhulu njalo ibuhlungu ngendlela uNozipho afe ngayo.
Uyise kamuyi uMnumzana Lifa Ntuli ubikele uMthunywa ukuthi ngabe umntanakhe waphenduka ekhaya kulokuthi akhethe ukuzibulala.
“Sibuhlungu ngesehlakalo esinje, ngibona kungcono ukuthi ngabe waphenduka ekhaya njengoba waseyaliwe. Umkhwenyana laye kwakumele aphendukise umntanethu ngendlela eqondileyo njengokuzamthatha kwakhe,” kutsho uMnu Ntuli.
Intatheli izame ukukhulumisana lomkakhe kamuyi uMnu Nyoni yena ongakulandulanga konke lokhu.
Uveze ukuthi baxabana lomkakhe ngakho ngokufuthelana wasesithi kahambe ngakibo. Uthe yena wayengazi ukuthi lokhu kwakuzadala ukuthi abantwabakhe ababili basale bengasela nina.
“Ngeqiniso saxabana lomkami kodwa ngangingazi ukuthi kuzacina sokunje. Kubuhlungu ngakho ngiyazithonisisa emoyeni wami,” kutsho uMnu Nyoni.
Isikhulumi samapholisa eMatabeleland South uInspector Philisani Ndebele uveze ukuthi udaba olunjalo belungakafiki endlebeni zabo ngakho bazaludingisisa.
“Besingakalwamukeli udaba olufana lalolo kodwa sizaludingisisa,” kuphetha uInsp Ndebele.
Online Reporter