Online Reporter
Sikhumbuzo Moyo eseBinga
UMSEKELI kaMongameli welizwe uKhomuredi Kembo Mohadi uthe imitshina yakulezinsuku esetshenziswa eKasambabezi Border Post yenza umsebenzi uqhutshwe kuhle.
UMsekeli uMohadi, ufike kulo umngcele eloMphathintambo wogatsha olubona ngokwenzakala kuleli kunye lamagugu uKazembe Kazembe kanye loMphathintambo obona ngokwenzala esabelweni seMatabeleland North uRichard Moyo.
UMsekeli kaMongameli uvakatshele indawo lapho okusebenza khona abeZimbabwe Immigration Department leZimbabwe Revenue Authority (Zimra).
Uthe ebona indlela uhlelo lolu olusebenza ngayo, uMohadi ubuzisise iziphathamandla ze-Immigration ngendlela abaphatha ngayo abantu abangena labaphuma elizweni, ukusebenza kohlelo, indlela okuvikela ngayo umngcele kanye lamandla alo okuphatha inani elikhulu lezihambi.
Iziphathamandla zichasise ukuthi uhlelo lolu lwenza umsebenzi uhambe masinyane, lulondoloze ulwazi ngendlela eqondileyo, luqinise ezokuvikela njalo lwenza kube lula ukuhamba kwabantu lempahla phakathi kweZimbabwe leZambia.
Baphinde bathi indlela entsha le inciphisa ukusetshenziswa kwamaphepha, iqinise ukuphathwa kuhle kwemisebenzi njalo ivumele ukulandelwa kwemisebenzi yonke eyenzakala emngceleni ngesikhathi sinye.
Ukuvakatsha kukaMohadi bekuyingxenye yomkhosi wokuvulwa ngokusemthethweni kweKasambabezi Border Post, okukhangelelwe ukuthi kuthuthukise ezokuthengiselana lokuhamba phakathi kweZimbabwe leZambia.
