Online Reporter
Raymond Jaravaza eseLupane
BEKU labantu abanengi abathe gwaqa eMatabeleland North Provincial Heroes Acre eLupane, ngoMvulo, bekhumbula amaqhawe lamaqhawekazi adlula emhlabeni esempini yokulwela inkululeko yelizwe.
Ilizwe linanza iminyaka engu-46 kukhunjulwa amaqhawe alwela inkululeko.
Abantu ababuthene kulindawo yokuphumula kwamaqhawe bebevela ezigabeni etshiyeneyo njalo begoqela intsha, asebekhulile labantwana, okutshengise ukubaluleka kokulondoloza imbali lozinikela kwamaqhawe.
UMphathintambo weMatabeleland North okhangele iProvincial Affairs and Devolution uRichard Moyo uhlangane lemuli zamaqhawe lamaqhawekazi alwela empini, abanye babo abafike eHeroes Acre ekuseni ngo-7am.
Iziphathamandla zikaHulumende, amalunga eZanu PF Politburo leCentral Committee, induna labanye abakhokheli bomdabu bebekhona kulumkhosi.
UMphathintambo uMoyo wethule unbiko uMongameli Emmerson Mnangagwa, obephethe umkhosi omkhulu eNational Heroes Acre eHarare.
Okunye obekulindelwe kakhulu emikhosini yamaqhawe yikunikezwa kwendondo kumaqhawe lamaqhawekazi empi yenkululeko, njengendlela yokuhlonipha ukuzinikela kwabo.
