Online Reporter
Patrick Chitumba
KULOMONGIKAZI weGweru (56) ozibulale ngokuzidubula ngombhobho wohlobo lwe-303 rifle ngemva kokusolwa ngokuhlukumeza ngokocansi isihlobo sakhe esileminyaka engu-10 yokuzalwa.
Amapholisa asevule uphenyo oluqondane laleli icala, ezama ukuthola ukuthi kwenzakaleni.
Isikhulumi samapholisa esabelweni seMidlands, u-Inspector Emmanuel Mahoko, uthe umufi, uFarai Zindonda (53), obengumongikwzi, watholakala efile endlini yakhe esabhabha seWoodlands, eGweru ngeviki edluleyo.
“Amapholisa aqinisekisa ukuthi aphezulu kokuphenya icala lokufa ngokuzibulala. Indoda eleminyaka engu-56 yokuzalwa yatholakala ifile, umzimba wayo uthe daca phakathi kwegazi endlini eseWoodlands, eGweru, mhlaka 29 Mpalakazi,” kutsho u-Insp Mahoko.
Uqhubeke wathi kusolwa ukuthi umufi wazidubula, njengoba wayelokhe ebambe umbhobho we-303 rifle obulenhlamvu eziyisitshiyagalolunye, ukhangeliswe ekhanda lapho okwaku lesilonda khona.
“Siphakathi kokuphenya okwenzakeleyo ukuze kutholakale imbangela epheleleyo yokufa. Umufi kuthiwa nguFarai Zindonda (56),” kutsho u-Insp Mahoko.
U-Insp Mahoko uxwayise umphakathi ukuthi ukuzibulala ayisikho okuxazulula inkinga.
“Abantu kabafunde ukukhuluma lokucela usizo ebantwini ababathembayo ukuze babeluleke.”
Omunye walabo abaseduzelane lomufi uthe kusolwa ukuthi umongikazi lo wayehlukumeze ngokocansi umntwana oleminyaka engu-10, olilunga lomdeni wakhe.
“Kuthiwa abanye abemuli bazwe ngalesi senzo, njalo bebefuna ukumangala emapholiseni, yikho lapho acabanga ukuthi azibulale,” kutsho umfakazi lo, ocele ukuthi kungabikwa ibizo lakhe.
