Online Reporter
UPHITHENE amakhanda umdeni wesalukazi seNhlayenza, eDududu eSouth Africa esitshiswe lendlu sacina ngokutshona esibhedlela sisolwa ngokuthakatha, njengoba umphakathi usukhiphe umyalelo wokuthi awufuni singcwatshwe endaweni.
Intatheli ibilokhu ibika ngaloludaba, oluqale ngesikhathi kutholakala isidumbu sengane eqeda kuzalwa ngasenhla komuzi wesalukazi uNkosikazi Jabulile Mbongwa (78). Kuthiwa ingane yayitshiywe nguMnumzana Mxhumanisi Ngcobo owaziwa ngokuba liphara endaweni. UNgcobo kuthiwa, uthi wayethunywe nguNkkz Mbongwa ukuthi amtholele yona ukuze enze umuthi, kodwa wayichitha esefike layo, ekhala ngokuthi kayikabi lenwele.
Ngemva kwalesi sehlakalo umphakathi weNhlayenza waba lomhlangano udingida lolu daba, kwacina kutshiswe umuzi kaNkkz Mbongwa.
Ngokuthola kwentatheli, umufi ubetshe kakhulu kwacina kubangela ukuthi bamuse esibhedlela.
Indodana kamufi, uMnumzana Zakhele Msomi, ithe basaxoxisana lenduna ukuthi kuzokwenzakalani, njengoba umphakathi usutshilo ukuthi kawusifuni isidumbu sikanina endaweni.
“Sididekile ukuthi yikuphi okumele sikwenze manje ngoba umama utshiswe lendlu engenzanga lutho, manje abasafuni simngcwabe lapha. Mina ngifuna bangitshele ukuthi umama wabulala bani, ngoba angikaze ngizwe. Okubuhlungu lami angisalali ekhaya njengoba sebetshilo ukuthi bafuna ukungibulala. Ngihlala ekhaya emini, ebusuku ngilala emizini yabantu,” kutsho uMsomi.
Yize uMsomi elomuzi wakhe eceleni komuzi kanina kodwa, uthe abantu bathi abafuni lutho olusondelene loNkkz Mbongwa endaweni.
Induna yendawo, uMnu Mathawula Gumede, ithe selufikile kuyo udaba lokuthi umphakathi kawusifuni isidumbu sikaNkkz Mbongwa endaweni.
“Inkinga enkulu le esibhekene layo, lesingakabi lesixazululo sayo okwamanje. Ngisayibikele lenkosi ukuze ingenelele, ngoba lami ludaba olungixakile. Ngike ngazama ukubiza umhlangano ngoba ngifuna ukuxoxisana lomphakathi, amapholisa anginqabela, athi kayidingeki imihlangano okwamanje ngoba kulabantu okusamele babotshwe endaweni ngokutshiswa komuzi kukamama uMbongwa lokutshona kwakhe.
“Ngokutsho kwamapholisa, banrngi abasazobotshwa njengoba kukhona ababili asebebotshiwe,” kutsho induna uGumede. Indodana kamufi, ithe abakazi ukuthi unina bazomngcwaba nini, futhi bafuna ukuthi angcwatshelwe emzini wakhe. —Ilanga
