adminMsilisi Dube
UMSEKELI kaMongameli welizwe uKhomuredi Phelekezela Mphoko usephathise izakhamizi zePumula ngemitshina yokuthunga kunye lesigayo ukuze bazithuthukise.
UKhmrd Mphoko unikeze izakhamizi lezi impahla lezi ngoMgqibelo. Izakhamizi lezi ziphiwe imitshina yokuthunga emibili ebiza imali engange-$1 400 kunye lesigayo esibiza amadola angu-$5 000.
Ngesikhathi ebanikeza impahla le utshele izakhamizi ukuba akusizi ukuba abantu bahlale phezu kwezandla bemelele ukuphiwa ukudla nguHulumende.
“NjengoHulumende sibone kufanele ukuba siliphe imitshina le ukuze lenelise ukuthunga izigqoko. Izigqoko lezi lingazithunga lilakho ukuzithengisa beselizitholela imali. Ngifisa ukuba ngolunye usuku ngithole sekuthengiswa impahla ezithungwe ngabantu bePumula.
“Nxa impahla lezi zingathungwa kuhle abantu balakho ukwenelisa ukusekela izimuli zabo. Isigayo lesi ngiyazi ukuba sizalinceda ngoba lizabe seligayisa kiso.
Uqhubekele phambili wathi uHulumende uzaletha ezinye inhlelo ezizaguqula uBulawayo abuyele esimeni sakhe sakudala.
UKhmrd Mphoko ubuye waveza ukuba uHulumende uzimisele ukuncedisa isigaba ngesigaba ngaphansi kohlelo lweZim Asset.
“Saphawula uhlelo lweZim Asset lona olukhangela ngokuvulwa kwamathuba emisebenzi kunye lokuvuselelwa kwamankampani. Nxa kusiyaphela umnyaka lo kumele amankampani amanengi abe esesebenza ukwenzela ukuba abantu bakoBulawayo bathole imisebenzi yokuziphilisa,” kuphetha uKhmrd Mphoko.
Online Reporter