Online Reporter
YiNtatheli kaMthunywa
KULOMPHUROFETHI weKwekwe ogwetshelwe ukupika iminyaka engu-15 entolongweni kulandela ukudakisa lokudlwengula intombazana eleminyaka engu-16 yokuzalwa andubana acatshe ngomunwe athi umgezisa umnyama.
Umphurofethi lo, oleminyaka yokuzalwa engu-42 umiswe phambi kukamantshi emthethwandaba weKwekwe Regional Court.
Umamangala wahamba endlini kamphurofethi lo, mhlaka 27 Mpandula 2025 efuna imithandazo ngoba engezwa kuhle.
Umphurofethi kubikwa wabikela umamangala ukuthi kudingeka ukuba ahlangane laye emacansini ukuze asile.
Umamangala wakwala lokhu, kodwa umphurofethi wamqambela amanga wathi amlandele enhlane ukuze ayemgezisa.
Sebefikile wamnika ilembu elibomvu wathi alibophele eqolo, wasemnika ‘umuthi’ wathi awunathe. Ngemva kokunatha umuthi lo, umamangala wezwa sengathi ulesiyezi, umphurofethi lo wamfuqela phansi wamdlwengula.
Ngemva kokwenza ihlazo, watshela umamangala ukuthi uselatshiwe wasuka wahamba. Ngosuku olulandelayo umamangala wabikela unina, owahle waqonda lomamangala enkambeni yamapholisa okwenza umphurofethi lo wabotshwa.
INational Prosecuting Authority of Zimbabwe (NPAZ) isole isenzo sendoda le yasikhuthaza umphakathi ukuba usekele labo abadlwengulwayo.
“Ukudlwengula kuyikuhlukumeza amalungelo lesithunzi somuntu, uzulu uyanxuswa ukuthi amelane lodlame lokuhlukuluzwa kwabantu emacansini ngokusekela labo abayabe behlukuluziwe futhi babike amacala anjalo ngokuphangisa kwabomthetho.”
