Sidumisile Mabena
Lovemore Dube
OWAKE wabangumqeqetshi weqembu lelizwe kumdlalo we-volleyball uVulindlela Moyo usedlule emhlabeni.
UMoyo, obedume ngelithi “Coach Jasper” ubeleminyaka engu-58 yokuzalwa. Umfowabo uLucky Dube ubike ukuba umuyi ubegula okwesikhathi eside njalo udlule emhlabeni ngeSonto.
Umuyi uhlonitshwa kakhulu ngomsebenzi awenzayo emdlalweni okweminyaka eyedlula amatshumi amathathu lanhlanu. Ngeviki edluleyo uMoyo uphakanyiswe yinhlanganiso yeBulawayo Metropolitan Volleyball Association, ibonga umsebenzi wakhe wokuthuthukisa umdlalo kulelidolobho.
Kulesinye njalo isicoco akade ezasithola ese ‘The Last Man Standing’ ebesivela kulabo ake adlala labo. UMoyo ubeqeqetsha njalo iqembu leSpartan.
Ukuphatheka ku-volleyball, uMoyo waqala ngomnyaka ka1987 eseNtumbane High School lapho azakhela udumo elabadlali abagoqela uMakhosini Tshabalala loNkosana Sibanda.
Ngo1989 waba yingxenye yabadlali abangena kuqembu leVikings Volleyball Club eTshaka Youth Centre lapho okwakulo Francis Moyo, Raerburn Ndebele lomuyi u-Augustine Ngulube.
Kusiyphela umnyaka, iVikings yaba yingxenye yeHighlanders Sports Association, okwenza yacina isidlala kuMatabeleland Volleyball Association iyiHighlanders.
UMoyo wakhula waba ngumdlali oyinsika eqenjini, waba ngomunye wama-hitters athenjiweyo eMatabeleland, waze wabizwa kuqembu lesabelo elancintisa kuma-Inter-Provincials eGweru ngo1992.
Wathola isicoco esikhulu ngo1993 kuMatabeleland Volleyball Association Mid-Season Tournament eloSikhumbuzo Gwala, Ndebele, Edson Gift Sibanda, Qinisa Fuyana loFortune Sithole-Ndlovu.
Ekupheleni kuka-1994, uMoyo wakhethwa ku-All-Africa provisional squad kodwa wedlulwa ngu-Erasmus loValentine Ernest Mangava. Kazange alahle imbeleko nanko wacina esiba ngomunye wabadlali abaphatheka kuma-All-Africa Games.
Ngo-1995, uMoyo waba ngomunye walabo abasungula iBulawayo Raiders, iqembu elaba yintshantshu yeZimbabwe Open ngo-1996.
Umuyi waqeqetsha njalo leqembu leZRP Raiders. Phezulu kwalokhu, wakhethwa ukuqeqetsha iqembu lelizwe labesifazane njalo wayephethe isithupha se-International Volleyball Federation (FIVB) Level Three.
Kusenjalo inhlanganiso ephethe i-volleyball kuleli iZimbabwe Volleyball Association ithe: “Silusizi ukulazisa ngokudabuka kwethu ngokulahlekelwa yinsizwa eyayiyisibuko somdlalo, uCoach Jasper (V. Moyo). UCoach Jasper ubeyinsika enkulu emphakathini we-volleyball. Ubewuthanda umdlalo njalo ukuzinikela kwakhe ekuphumeleleni lokukhuthaza kwakhe abadlali bonke sizakugcina.
“Sethula amazwi enduduzo kumuli, abangane kunye lakumphakathi ngalesisikhathi esibuhlungu.”
Online Reporter