adminYiNtatheli kaMthunywa
UJULIUS Ndlovu umqeqetshi wabonozinti beqembu lenguqu iChicken Inn uzakhipha imali engange $2 000 kulandela ukutholakala elecala lokuhlukumeza udokotela weDongo Sawmills.
UNdlovu, ongumqeqetshi osehlale isikhathi eside kuma-Gamecocks wenza ihlazo leli kuhlandla lakuqala lesizini ngokuthela “amanzi” ebusweni bukadokotela weDongo Sawmills uUrayai Chipangare.
Isizatho salokhu asaziwa kodwa isenzo sikaNdlovu yiso esadala ukuthi kumiswe umdlalo wamathimu womabili enkundleni yeLuveve.
IDongo yala ukuqhubeka ngomdlalo ngoba abadlali bayo besithi angeke balikhabe bakhululekile nxa bengela dokotela.
UNdlovu wasila ukubotshwa ngamapholisa enkambeni yeLuveve ngoba kungacaci ukuthi icala lakhe ngelani.
NgoMvulo kuliviki inhlanganiso yePremier Soccer League ikubone kufanele ukuthi igaxe uNdlovu icala.
Isimanga yikuthi iPSL inikeza iChicken Inn imiklomelo yonke yomdlalo ngokuvumelana ukuthi yanqoba 3-0. Lokhu kutsho ukuba iChicken Inn isibuyele phezulu kwengalane yamathimu.
Isethula isinqumo sayo ngecala likaNdlovu, inhlanganiso yePSL ithe iDongo Sawmills ijeziselwe ukuthi yehluleka ukuqhubeka ngomdlalo loba nje babekhona odokotela beEmras njalo onompembe lamapholisa bazama ukupholisa umsindo kwehlula.
“Onompembe abakhulu kanye lamapholisa bazama ukuthi akhulumisane leDongo Sawmills mhla wodlalo kodwa kakuzange kube lokuzwanana ngakho laselikhalala umdlalo. Lokhu kuchazwe njengokudelela ngumbiko wePSL ophethwe liphephandaba likazulu.
Online Reporter