Online Reporter
Ethel Ncube
ELOKUFA kalitsheli ngempela, lesisaga sigcwaliseke kwelinye inina leChiredzi elisele likhakhamele ngemva kokubizelwa umsebenzi (i-piece job) ngelinye inina kanti lizatshontshelwa usane.
Kubikwa uLetwin Ngadini wabizwa ngelinye inina elilendlu eyakhiwayo duzane lalapho ayeloja khona wathi ufuna amhlanzele iguma lakhe.
Kubikwa bathi befika inina lelo, lamthuma ukuthi ayedinga ifotsholo kwenye indawo kanti lifuna ukumtshontshela umntanakhe olenyanga eziyisithupha.
Isikhulumi samapholisa eMasvingo uKudakwashe Dhewa uqinisekise ngesehlakalo lesi.
Uveze ukuthi umetheswacala, owayezenza umqhatshi watshela uNgadini ukuthi kungcono atshiye umntwana ukuze enelise ukugijima aphenduke masinyane.
UNgadini watshiya umntwana lomqhatshi lo kodwa wathi ebona esetsholobele wanyamalala lomntwana.
Ekuphendukeni kukaNgadini ngemva kwemizuzu engu-30 wathola “umqhatshi lo” engasekho lapho amtshiye khona losane lungekho.
“Kulenina elaqhatsha uLetwin Ngadini lisithi lifuna ukuba alihlanzele iguma lalapho elakha khona indlu kanti lona lilakho elikujongileyo labaleka lomntwana olenyanga eziyisithupha alaziwa lapho elikhona.
“Ongabe ezwile kumbe olodletshana ngenina elintshontshe umntwana sicela athinte amapholisa aseduzane laye kumbe atshayele ucingo kunombolo lezi 0775 996 945,” kubika uInsp Dhewa.
