Online Reporter
Thupeyo Muleya eseZezani, eBeitbridge
UMSEKELI kaMongameli, uConstantino Chiwenga, ulumathise isibane senkululeko eJuliet (Zezani) Assembly Point, eBeitbridge esabelweni seMatabeleland South ngoLwesihlanu.
Lokhu kuyingxenye yokuqala komkhosi wokuthakazelela ilanga likaZibuse, ozaqhutshelwa eMaphisa, esigabeni seMatobo mhlaka 18 Mabasa.
Kumbuthano weZezani bekugcwele abantu abavela kundawo ezitshiyeneyo zesabelo, bezobona lumkhosi oqakathekileyo kumbali yakuleli.
Ukukhanyisa isibane senkululeko kumela inkululeko, ukubambana lokuvuselela ukuziqhenya njengezizalwane zakuleli.
UMsekeli kaMongameli ubehamba loMphathintambo wogatsha lwe-Home Affairs and Cultural Heritage uKazembe Kazembe, uMphathintambo wogatsha olubona ngezokukhitshwa kwembiko, u-Zhemu Soda, uMphathintambo obona ngokwenzakala esabelweni seMatabeleland South u-Albert Nguluvhe kunye lezinye iziphathamandla zikaHulumende.
I-Juliet Assembly Point (Zezani) yindawo elembali ebalulekileyo kuzibuse wakulali nanko yadlala indima enkulu ngesikhathi sempi yenkululeko, lapho amabutho eZIPRA leZANLA ahlangana khona ngaphansi kokulawulwa kweCommonwealth.
Le yiyo yodwa i-assembly point esabelweni seMatabeleland South njalo ingenye yezindawo ezilitshumi lasithupha ezikhona elizweni lonke.
INational Museums and Monuments of Zimbabwe yiyo eyathuthukisa lokulondoloza lindawo, lapho okwakhiwe khona isisekelo sesibane senkululeko, kwaphanyekwa amafulegi, umfanekiso webutho olungiswe ngensimbi, indlu lebhodi echasisa ngembali yendawo.
