Online Reporter
BANENGI osaziwayo abaphoxekile ngomqhudelwano wezindondo obubanjelwe eGallagher Convention Centre, eGoli, ngoMgqibelo, amaSouth African Music Awards (Samas). Amakhala aqale ukutshaywa ngalo usuku lomcimbi lapho inengi labaculi abawinileyo belingabonwa.
Kuke kwaba lesikhathi kulindwe uKhuzani ukuba azolanda indondo yeBest Maskandi. Nezindondo ezisemqoka ezitholwe nguMthandeni SK, iBest Record of the Year leBest Music Video of the Year, lezithathwe yimenenja yakhe. UGoldmax wodumo kuDestruction Boyz, uhlabane ngeBest Album, Best Gqom leBest Male kodwa akazilandelanga lezi zindondo. Kanjalo loKabza De Small, Dlala Thukzin loKevin Momo bebengabonwa langokhalo.
Akugcinanga lapho, ukuwina kukaThandiswa Mazwai indondo yeBest Female Artist kutshayise amakhala. Inengi lithe bekufanele inikezwe umculi wamapiano uZee Nxumalo ngenxa yokuthi utshisa izikhotha kulezi zinsuku. Laye uThandiswa uthe bekufanele lendondo ithathwe nguZee Nxumalo ngenxa yamagalelo akhe kulo nyaka.
UZakes Bantwini ukhwele wadilika kulo mqhudelwano obusuwenzeka okwesi-31, wathi awusafani lakuqala futhi sewehlelwe yisasasa kangangoba ubengazi lokuthi bewenzeka ngesonto eledlule.
“Ngingumculi kodwa bengingazi lutho ngawo. Akukhona ukuthi ngibudedengu kodwa yilapho sesikhona. AmaSama abetsho lukhulu futhi eyiyona yonke into. Manje? Inengi lethu esisendimeni yomculo besingazi ukuthi abenzeka. Sidinga ukukhuluma ngokuthi sifike kanjani lapha.”
UZakes uthe akufanele ngabe abantu abaqokwe kumaSama baya konandisa kweminye imicimbi ngoba kufanele ngabe asesezingeni lomqhudelwano wezindondo wase-USA, amaGrammy Awards. Uthe abaculi labalandeli baqala ukuwangabaza amaSama ngesikhathi sekuwina nanoma ngubani, ngitsho elengoma engaziwa.
Ubuye wathi akungagxekwa amajaji labahleli balo mqhudelwano kuphela kodwa labaculi abazinuke amakhwapha ngoba akukuhle ukungafiki kwabaculi ekubeni beqokiwe. Abanye osaziwayo abatshiye abangalazi ngomdidiyeli wezingoma ohlonitshwayo ngokuvumbulula uBerita loKwesta, uNhlamulo
“Nota” Baloyi, umculi we-Afro soul u-Enzo kanye lomethuli wezemidlalo kwiSABC 1 u-Andile Ncube. Kubuye kwakhalwa langabebephethe uhlelo uSiyabonga Ngwekazi loPamela Mtanga.
Inkinga kumaSama aziqali manje, sekulesikhathi zenzeka. Abaculi bakamaskandi uBhekumuzi Luthuli loThokozani Langa bake bahlula kanengi izingwazi zombhaqanga iSoul Brothers kuBest Mbhaqanga Album ngamacwecwe kamaskandi. Umculi wekwaito uZwai Bala wake wahlabana ngeBest Rap Single ngo-2001 ngomucu wokholo iLifted.
Namanje kusakhalwa ngaleyo ndondo. Kuze kwatshaya isikhathi sokushicilela kungakatholakali ukuphawula kwabamaSama. – Ubulembu
