Online Reporter
YiNtatheli kaMthunywa
KUBOTSHWE umtshayeli wegonyethi ebelisiya eHarare kumngcele weBeitbridge ngoLwesibili, esolwa ngecala lokungenisa ngudlu amasaka embanje ayisilinganiso se-692kg, evela elizweni leSouth Africa.
Ekuqaleni kwenhlolisiso kuvele ukuba umtshayeli lo ufake amabhele la angu-34 egonyethini abelitshayela eMusina, eLimpopo province.
Kubikwa izidakamizwa lezi zibiza imali engange- US$69 167.
Umfakazi oyingxenye yalabo ababona ngezokuphepha kumngcele lo, uthe bamukele udletshana oluvela kumfakazi oqotho ngokungeniswa kwezidakamizwa lezi ebezisiya edolobheni leHarare.
“Samukele umbiko wokuthi kulegonyethi elithwele izidakamizwa, sasesisebenzisana le Zimbabwe Revenue Authority (Zimra), ukuthi sihlole amagonyethi, kwatholakala amabhele la angu-36 abethwele yigonyethi yeMachete Logistics and Transport of South Africa elenombolo ezithi; Horse BJ99BXGP, Trailer 1, MN87JVGP lo Trailer 2 M87KGP,” kutsho ufakazi lo.
U-Officer Commanding Beitbridge District Chief Superintendent Mesuli Ncube uthe umtshayeli wegonyethi lo usolwa ngecala lokutholakala elezidakamizwa ezingekho emthethweni. Uthe umetheswacala uzamiswa emthethwandaba maduze kulindwe ukuqhubeka kwenhlolisiso.
UChief Supt Ncube uthe amapholisa asebenzisa indlela ezintsha zokuthi babophe labo abathengisa izidakamizwa wabuye wancoma usekelo amapholisa alutholayo oluvela kumphakathi ukuze kulwiswe izidakamizwa.
UHulumende usungule ikomithi ebizwa ngokuthi yi-Inter-Ministerial Committee ukuze ibumbe amasu okulwisa ukusetshenziswa kwezidakamizwa elizweni.
Lokhu sekudale ukuthi kusungulwe amawofisi amane eZRP Drugs and Narcotic Units kumngcele we-Beitbridge; iVictoria Falls; Chirundu; kanye leMutare.
