Online Reporter
Fungai Muderere
INKUNDLA yeBarbourfields izabe igcwele phamu, kungela onyikinyekayo, kumdlalo omkhulu weChibuku Super phakathi kweHighlanders leScottland.
Okuzadonsa amehlo mhla welanga, yikuza kukaKnowledge Musona, umdlali owazakhela udumo etshibilika ekumaWarriors lakuKaizer Chiefs.
UMusona uzabe eqala ukunyathela enkundleni yeBarbourfields, okuyikhona okuzafuna ukubonwa ngabazabukela umdlalo lo. Abanye abadlali beScottland abazadonsa amehlo nguKhama Billiat loPeter Muduhwa.
Amaqembu womabili ahlangana kumahlandla amabili kuligi yeCastle Lager. Kumdlalo wakuqala, zadlala ngokulingana kwaba yi 1-1. Kowesibili iScottland yanqoba 2-1.
UMuduhwa uthe kuzafiwa.
“Angisoke ngikhulume amazwi amanengi. Kuzabe kungumdlalo onzima. Kuzafiwa.”
Komunye umdlalo weChibuku Super quarter-final, iDynamos idibana leTriangle. IDynamos yanqoba inkezo le ngo2023 lango2024. IHighlanders yaba yintshantshu ngo2019.
Elinye iqembu eselike lathi mothu iChibuku Super yiTriangle.
luyaqhubeka udaba ku www.umthunywa.co.zw
Kusenjalo, abalandeli bomdlalo wenguqu abazafuna ukubukela umdlalo weHighlanders leScottland bazabhadala imali yikungena esukela ku$5.
Kukhangelelwe ukuthi umdlalo lo uphinde ulethe ithuba lokwenza imali kulabo abathengisa ukudla lokunathwayo.
Labafana abasebenza ukulinda izimota phandle kwenkundla balinde ukuthola imali.
Omunye wabafana laba, u-Ishamael Dumani uthe:“Sikhangelele ukuthi sitshaye imali kulumdlalo. Sabona ukuthi kuyavuma emsebenzini wethu iScottland ibuya lapha. Sizavukela khona ngeSonto.”
Umsekeli wodumi kuHighlanders uDuduzo “Teekay” Sibanda uthe bazayigcwalisa inkundla, bakhuze iqembu linqobe.
“Ngeke balunge eBarbourfields. Sizabavimba ngobunengi bethu.”
Imidlalo yeChibuku Super Cup Quarter Final ngokugcweleyo:
NgoMgqibelo: Manica Diamonds v Triangle (Sakubva Stadium), Dynamos v ZPC Kariba (Rufaro Stadium)
NgeSonto: Bikita Minerals v MWOS (Gibbo Stadium), Highlanders v Scottland (Barbourfields Stadium)
derick.khumalo