Online Reporter
Ugwalo Emfuleni wezinyembezi olwalotshwa ngu Ezekiel S K Hleza
Ophezulu Stinta
Ngeviki edluleyo sitshiye uSpinoza esenze isimanga sendaba engajayelekanga, eyaze yakhalisa abafowabo. Wayeseliphumelelisile icebo lokuthi omunye wabo wayengeke ngitsho ayebanjwa yizandla zesitha, kwakungaba yikutshabalala kwabo bonke, ukutshabalala kombono wabansundu ngelizwe labo.
Abamhlophe phela babezafuna yonke imininingwana mayelana lokulwa kwabo, inhlelo zabo kanye lendlela zabo zokukhulumisana, lokulwa nje jikelele lokucatsha konke okumqoka. uMgandane kwakuzamele nje ayitsho indaba yonke loba uMgandane wayeyindoda eyayizimisele ukufa igcike isifuba kodwa kwazi bani umuntu esengene lemfihlo engaka enkambeni yesitha, kukhona ababezasala lakho bayethumba ngakho inkamba, batshaye baqothule.
Yikho nje uSpinoza wayebhejela ukuthi leyo ndizamtshina avele nje ayitshaye isemoyeni itsahake, wonke umphefumulo ophakathi ube ngumlotha, kugoqelwa kanye lokaMgandane. Yayinzima, isinda imfihlo yenkamba, imfihlo yebutho yayilinganiswa lomphefumulo.
Amadoda eganga adla amathambo engqondo ukuthi benzeni pho ngendizamtshina le abasebeyithumbile. Abanye babebona izaba luncedo olukhulu ukubathwalela izikhali zabo ezinkulu ngokuzibalisa kwabo njengoba impi le yayihlomile isiza ngamandla amakhulu okwamagama labo ke babezahamba lula kambe sebezindizela emoyeni befana labamhlophe.
USpinoza wayelokhu ebambe ucingo lokukhulumisana emoyeni lapho ezwa khona ukuthi lukhulu oluzayo lwalufana nje lempukane ezazilandela inyama ebolileyo. Amathambo engqondo kwakungamelanga alale kodwa agaye okomtshina wegesi, kwasekumele kuhlelwe kahle ukuthi impi le ezayo ithiywe endleleni lapha ingakaze ifike kibo.
UMackean ke yena kwavunyelwana ukuthi ake agcinwe okwensukwana ezimbalwa kuqoqwe wonke amadoda ayesidla mganu munye lamabhunu, ukuze babulawe ngendlela ebuhlungu ehambelana lochuku lwabo, kwakungavumi ukuthi isitha sikhululwe nje mahlayana, kwakumele sihlawule, kukanti labathumbi labo kwakumele babhodle mpela ubuhlungu bonke ababelabo. Ayelindiwe amajaha ayehanjiswe embizeni yezempi, ayephekwe avuthwa busu, eselindele ukugadla ngawo wonke amakhono abawafundiswayo, baqeqetshwa, bawabambisisa ngemfanelo. Pho kuzo zala nkomoni.
