Online Reporter
Nkosilathi Sibanda loLangalakhe Mabena
INKOSI uMzilikazi ibatshazwa ngokuba yisibonelo sokubusa ngendlela elobuciko, ukuthula, ukulingana, ukuxolelana lengqubekela phambili.
Lokhu kuvezwe nguDokotela Samkele Hadebe ekhuluma kumkhosi weKing Mzilikazi Indaba, eLarge City Hall, koBulawayo ngoLwesihlanu kuviki ephelileyo.
Umbuthano lo ubuqoqwe yiKing Mzilikazi KaMatshobana Royal Institute (KIMMRI) leZimpapers, ngenjongo yokubabaza imisebenzi yeNkosi uMzilikazi, kubikwa imibono yokuthi kungani kuqakathekile ukuthi imbali yakhe ikhulunywe.
Indikimba yombuthano ibisithi: Reclaiming African Heritage through the life and legacy of King Mzilikazi.
Esethula umbiko wakhe, uDkt Hadebe uthe indaba yeNkosi uMzilikazi ibalulekile ukuthi ixoxwe lokuthi yamukelwe ngumphakathi ngoba ngumuntu owadlula kokunengi ekwakheni isizwe, waphumelela.
“UMzilikazi wayengabandlululi kumbe enguntando kayiphikiswa, ngoba ukube wayenjalo ngabe lapho esekhotheme, abantu ababutha endleleni babengahle babuyele lapho abavela khona. Ukuhlala kwabo kwaba yisitshengiselo sokuthi
kwakulokuthula embusweni wakhe,” kutsho uDkt Hadebe.
Ucebise abantu ukuthi ngomgubho kaMzilikazi, eMhlahlandlela ngoMpandula, baze bevunule ezamaNdebele, ukuze kutshengise ubukhulu, amasiko lokuzigqaja kwesizwe, kuthakazelelwa iNkosi.
Umgubho kaMzilikazi uzaqhutshwa mhlaka 5 lo 6 Mpandula.
Esinye isikhulumi, umgcinisihlalo wenhlanganiso yeMzilikazi Cultural Association uMnumzana Sipho Gama, ucele isizwe samaNdebele ukuthi sizigqaje ngemvelaphi yaso, ebika ukuba okumele kwenziwe kuqala yikulungisa lokugcina ithuna likaMzilikazi, eliseMhlahlandlela, eMatobo, esabelweni seMatabeleland South.
“Abazali kabanikeze abantwana imfundiso yesiNdebele, amasiko, imikhuba lendlela yokuphila ukuze imbali le itshiyelwe isizukulwane esizayo.”
INkosana uPeter Zwide Khumalo ukhuthaze uzulu ukuthi ahloniphe izinduna zomdabu.
“Sonke singaphansi kwezinduna. Kumele sizihloniphe ngoba zinkokheli zethu zomdabu. Thina njengabako Khumalo sicela isixwayiso kuzo nxa siqhuba okuthile emphakathini. Laye uMzilikazi wayethembe kuzinduna ukuthi athathe amanyathelo aqakathekileyo.
