Online Reporter
Nkosilathi Sibanda
KWEZOMCULO uyabusa, kuthi kwezokugqoka uyaceca!
Yiyo indlela abakhuluma ngayo ngomculi wodumo kuleli uMzoe 7 osekhule wasabalala waze wasungula ibhizimusi lempahla ebizwa ngokuthi #GagaGugu Wear, eselithandwa linengi koBulawayo kunye lakwezinye indawo lapho aziwa khona.
Umculi lo, uyachitha isikhathi ezama ukuqoqa ingoma ezintsha kumbe elolongela umcimbi othile, qede lapho ayecatsha emsamo adle amathambo engqondo kubhizimusi lempahla yokugqoka.
Kuyavela ukuthi ulethalenta kwezokufaka isitayila sakulezinsuku kumpahla ayithengisayo. Lokhu kuyabonakala ngosekelo aluthola ebantwini abathengayo lalabo abamhalaliselayo enkundleni zokuxhumana ebulenjini.
Bambalwa abaculi kumbe labo abasebenza ukuthokozisa uzulu abalesikhathi lesiphiwo sokwenza eminye imisebenzi eceleni. KuMzoe 7, kwabayinto eyavela njengobizo ukuthi asungule ibhizimusi lokuthunga lokuthengisa impahla yokugqoka.
Ezomculo lomsenko akwehlukaniseki ngokutsho kukaMzoe 7. Kungxoxo yakhe lentatheli ngoLwesithathu kuliviki, umculi lo
UMzoe 7 utshele iphephandaba likazulu kuliviki ukuthi ibhizimusi lomswenko wazalwa elifumbethe.
“Ubaba wayethunga impahla, njengalokhu esesikubiza ngokuthi yi-fashion designing ensukwini zalamuhla. Kutsho ukuthi ibhizimusi lempahla lisegazini,” kutsho umculi lo.
“Ngithe ngisungula iGagaGugu Wear ngaqala ngesikipa sikaMzoe 7, esabiza igama lami lomsebenzi. Isikipa lesi sathatha yonke indawo ngodumo, ngitsho laseSouth Africa.
“Sengiqale njalo ukwenza ezinye ezilomfanekiso wami lamakepesi akulezinsuku ama 5-panel. Luhlelo lomswenko olutsha, oluthole ukugquqguzelwa yimpilo yasemalokitshini. Amakepesi bawathanda kakhulukazi emakasi ngoba abuya eyimbala yonke njalo ayisitshengiselo salokho okuthandwa ngabantu. Ngokuvula leli ibhizimusi, ngilandela okufunwa ngabantu.”
UMzoe 7 uthe usebenzisa amandla eSocial Media lezinye inkundla zomculo axhumana khona labantu ukuthi ayethule ibhizimusi lakhe.
“Ngibonga uthando losekelo engilutholayo. UNkulunkulu muhle njalo.”
Ukukhula kwebhizimusi leGagaGugu lwabonakala mhla uMzoe 7 esungula umcimbi wakhe we-One Man Show eBulawayo Theatre ngoMfumfu.
“Ngosuku lwe-One Man Show sasungula i-design entsha yamakepesi ayiwona ahamba phambili kubhizimusi.”
Kusenjalo, uMzoe 7 ukhethwe phakathi kwabasakhulayo bakuleli abasebenza gadalala. Ubizwe kuluhlu lweGorindemabwe Frontier 100 Most Influential Young Zimbabweans 2025.
“Sisebenze nzima lonyaka. Ngiyabonga ukuthi ngingeniswe phakathi kwequla labasakhulayo abenza kuhle eZimbabwe. Ngizazama ukuphakamisa izinga kuyo yonke iminyaka,” kutsho uMzoe 7.
