Online Reporter
Mthabisi Tshuma
KUZABA ncane indawo kumcimbi weHeroes Gala enkundleni yeChemhanza eMubaira Growth Point eMhondoro, eMashonaland West lapho abahlabeleli ababalisa uMzoe 7, uClement Magwaza, uMa9Nine kanye leqembu leLMG Choir abazakuba yingxenye yokuvuthisa inkundla le.
Umkhosi lo uzaqhutshwa mhlaka 11 Ncwabakazi, njalo uzaqala ngehola lesithupha ntambama.
Umkhosi wokuthakazelela amaqhawe lo, uzahlanganisa abaculi abavela ezingxenyeni ezehlukeneyo zelizwe ngesikhathi iZimbabwe inanza amaqhawe ayo kuNational Heroes Day ka-2026.
Abanye abaculi abazahlabela bagoqela iPolice Band, uAllan Chimbetu, uChief Hwenje, uAndy Muridzo, uSimon Mutambi, uDorcas Moyo, uMadhuve Sasha, uPeter Moyo, uRomeo Gasa, uBaba Harare, uAgartha Murudzwa, uAtenda Chinx, uMark Ngwazi, uDT Bio Mudhimba loJah Signal.
Lonyaka iNational Heroes Day izananzwa mhlaka 10 Ncwabakazi ngaphansi kwesihloko esithi, “Singaze Salibala (Lest We Forget)”, lapho uHulumende eqhubeka ngemizamo yokulondoloza ilifa lempi yenkululeko ngokuvuselela lokulungisa izindawo ezilondoloza imbali yethu.
