Online Reporter
YiNtatheli kaMthunywa
KULENDODA evume phambi kwenkundla ukuthi ibithandana lonkosikazi kamalumayo ejeziswe ngokuthi ihlawule inkomo kunye lembuzi ezintathu.
UTarisiro Nyambodza umiswe phambi kwenduna uMakoni lapho okuvele ukuthi waya emacansini loLydia othandana lomalumakhe u-Obert Mutombosora.
Kubikwa uLydia loNyambodza babezikholisela uluju lwemvelo egangeni njalo bakwenza lokhu okwesikhathi eside.
UNyambodza umncinyane kuloLydia.
Inkundla izwe ukuba uMutombosora, olipholisa, wananzelela ukuthi kukhona okutshaya amanzi kulandela ukubona imiyalezo efonini yomkakhe.
“Ngabuza uNyambodza ngalokhu, ngamtshela ukuthi akhulume iqiniso ukuze ngimxolele. Wavuma ukuthi uthandana lomkami. Ngemva kwalokhu, kwaba lomhlangano wemuli njalo kwakulo sobhuku uNyamuronda.
“UNyambodza wathi bahlangana emacansini kabili. Kwangizwisa ubuhlungu lapho omunye wakoNyambodza ebika ukuthi kabasoke bangibhadale ngoba okwenzakalayo akusilobhizimusi. Ngazonda ngaphosa ngamtshaya ngehloka, ngavinjwa. Kodwa, usobhuku wathi bangibhadale inkomo ezintathu lembuzi ezimbili. UNyamboza wala.”
Uthe isehlekalo lesi kasiqalisi ngoba umtshado wakhe wakuqala wadilika ngenxa yokuthi omunye umzukulu koNyambodza walala lomkakhe.
“Akuqalisi. Ukhona omunye owakoNyambodza owalala lomkami wakuqala, umtshado waphela. Ngakhulisa abantwana bengela nina. Khathesi ngihlala loLydia,” kutsho uMutombosora.
Ebuzwa ngecala lakhe uNyambodza uthe: “Yebo liqiniso, ngake ngathandana laye. Salala sonke kabili egangeni.”
Induna uMakoni ithole uNyambodza elecala lokufeba, wagcona uLydia ngokufanayo.
ULydia uxwayiswe ukuthi ahlale engatshadanga nxa esehlulwa yikusuthiswa yindoda eyodwa.
Inkundla itshele uNyambodza ukuthi abhadale uMutombosora inkomo eyodwa lokuthi akhiphe imbuzi ezintathu njengesijeziso sokwenza ucansi egangeni.
Phezulu kwalokhu kumele abhadale i$180 yendleko zokuthethwa kwecala.
