Unatha itshefu, afe ngemva kokwehluleka i-O-Level

Bongani Ndlovu

KULONTOMBAZANA oleminyaka engu-16 yokuzalwa okubikwa ukhethe ukuthi azibulale ngokunatha itshefu ngenxa yokwehluleka ukuphumelela kumihloliso ye-O-level ka2025.
Isikhulumi samapholisa koBulawayo u-Inspector Nomalanga Msebele uqinisekise ukuba ngoLwesihlanu ngeviki edluleyo bathola udaba lokudlula emhlabeni kwentombazana ebihlala eNguboyenja koBulawayo.

Uthe isehlakalo lesi senzakale ngoLwesihlanu ngeviki edluleyo ngehola lesitshiyagalolunye ebusuku, ngemva kokuba umuyi ehlole impumela yemihloliso ebulenjini beZimsec.

“Ngemva kokubona ukuthi wayephumelele kuzifundo ezimbili, phakathi kweziyisikhombisa, wadana, waqalisa ukukhala. Kuthe esehlise umoya, wagijimela emkulwini lapho afika wathatha khona umuthi wokubulala amawuwu, wawunatha,” kutsho u-Insp Msebele.

Uqhubeke wathi: “Wabonwa ngomunye wabazawakhe okwenza lokhu, owasuka wahlaba umkhosi. Bazama ukumsiza ngokumnathisa uchago le-charcoal kodwa wedlula emhlabeni esesibhedlela seMpilo.”

U-Insp Msebele uxwayise abasakhulayo ukuthi bakhulume labazali babo, ababalisi labangane nxa kukhona okubahluphayo.

“Sixwayisa labazali ukuthi bengafaki imithi kumbe itshefu egcekeni, lapho okufinyelela khona abantwana.”