Online Reporter
Ethel Ncube
UMHLABELELI weRhumba uNdux Junior uzakwethula idlalade lakhe elitsha lalonyaka eMarisha koBulawayo ngempelaviki.
Idlalade leli elaqala lethulwa eMzansi mhlaka 1 Lwezi lizakwethulwa ekhaya koNtuthu.
Ekhuluma lentatheli uNdux Junior uveze ukuba eMzansi idlalade lakhe lenza kuhle kakhulu.
“Idlalade lami uKhalabemgeza ngalethula eMzansi ekuqaleni kwayonale inyanga abalandeli bami bangixhasa kakhulu ngendlela emangalisayo. Okwakhathesi ngizakwethula idlalade lami ekhaya eMarisha. Idlalade leli lilengoma eziyisithupha ezibalisa, ezithi Qoki, Ukhalabemgeza, Tjidzima hhuba, Bazalwane lethi Wanted, yizo ingoma ezikudlalade leli.
“Idlalade leli ngelesi-16 lokhe ngaqala uhambo lwami lokuhlabela. Kudlalade leli ngisebenzise indimi ezintathu isiNdebele, Kalanga lesiLungu. Ezinye ingoma zikhuluma ngokuthi abantu abafunde ukubonga, ezinye zikhuluma ngokubuyela kumasiko ethu kube lenye ekhuluma ngothando, ukuthi uthando sungaluthola endaweni ezikhatshana, sungaluthola emuntwini ovela khatshana afike akunikeze uthando oludingayo,” kutsho uNdux Junior.
Ubuye waveza ukuba unxusa wonke umuntu ukuthi aze ezozibonela eMarisha.
“Zakhamizi zakoBulawayo sukumani ngobunengi liyezizwela, ukutshelwa yikuncitshwa, asibuyeni ngobunengi lizwe esiliphathele khona,” kuphetha uNdux Junior.
