admin
Cornelius Luphahla
Kunsindaba-phenduli yendaba esigabeni sakoSigola empumalanga yedolobho lakoBulawayo sokuvele ukuba kulesakhamuzi ebesihlezi emzini waso lomvundla okubikwa ubethunywe ukuzokudla amathumbu aso, uMthunywa ukuzwile lokhu.
Impicabadala le ivele ngeviki ephelileyo ngesikhathi kukhitshwa inkalakatha yomvundla endlini kaMisheck Nyoni ngabaphurofethi abaveze ukuba ubefuna ukumbulala amudle ezangaphakathi.
Kubikwa okwenza kwanxuswa abaphurofethi esigabeni lesi yikuthi kwasokulezigigaba ezenzakalayo ezibalisa ukunyamalala kwabantwana, kanye lokufa kwesinye isakhamuzi ngemva kokutshaywa yimpama yomuntu esingambonanga.
Intatheli ixhumane lesinye isakhamuzi sakule indawo uNkosazana Simeleni Tshuma ochaze ukuthi uNyoni angabe elesazela ngomvundla lo.
“Ngokubona kwami uNyoni uyamazi umvundla lo ngoba kazange wazihlupha ngokubuza abaphurofethi laba ukuthi umvundla lo ngokabani. Wamane wababukela bemxotsha baze bambamba bayamtshisa engabuzanga lutho,” kutsho uNkszn Tshuma.
Ebuzwa ngale indaba uMnu Nyoni uvumile ukuthi umvundla wakhitshwa emzini wakhe.
“Kuliqiniso sibili ukuthi kwaphuma umvundla emzini wami ekhutshwa ngabaphurofethi bethi ubesefuna ukungibulala angidle ezangaphakathi,’ kutsho uMnu Nyoni.
Uqhubekele phambili njalo wachaza indlela abaphurofethi laba ababamba ngayo umvundla lo lokuthi bathini ngawo.
“Abaphurofethi bafika emzini wami baqala ukugijima iguma lonke bethi baxotshanisa umvundla lo. Kusenjalo bayangena ezihlahleni zesikusha eziseduzane lomuzi wami andubana bangene endlini yami.
“Isimanga yikuthi ababekugijimisa akulamuntu owayekubona noma nje abantu babebanengi ababebukele. Bathi sebengene endlini baguduza baphuma sebethwele umvundla lo kodwa bengene bengaphathanga lutho. Ngemva kwalokho bathi umvundla lo ubehlala emzini wami njalo kulabantu akade behlala bekhuleka emuva kwendlu yami bephehla udiwo lwegazi ngakho besengizakufa,” kutsho uMnu Nyoni.
Uphethe ngokuthi abaphurofethi labo bathi bafuna inhlawulo yenkomo ezimbili kodwa bacina bethe abhadale imbuzi.
“Babuya njalo bathi bafuna inkomo ezimbili ngoba sebengikhiphele umvundla lo bamtshisa mina ngala ukubanika.
Noma nje bacina sebefuna imbuzi ezimbili angizange ngabapha ngoba angikwazi lokhu abakukhuphayo,” kuphetha uMnu Nyoni.
Online Reporter