Online Reporter
Ethel Ncube
IMULI yakoDube eMagotsha Line eTsholotsho isiveze ukuba umuyi owabulawa yindodakazi yakhe lesithandwa sayo wangcwatshwa esivandeni uzabekwa okwesibili ngoLwesine.
UJenifer Dube (58) kucatshangelwa ukuba wabulawa nguLinnar Muzimela (34) encedisana lesithandwa sakhe esazakala ngokuthi nguNkosi ngenyanga kaNkwenkwezi loba isidumbu sivumbuluke mhlaka 2 Mpandula esivandeni.
Isidumbu sikamuyi sisemotsha yeTsholotsho njalo sikhangelelwe ukuyalala emzini wakhe ngoLwesithathu abekwe ngoLwesine.
Ilunga lemuli le, uMnumzana Phindumbone Moyo ubike ukuba njengemuli baphakathi kosizi ngendlela ilunga labo elabulawa ngayo isidumbu safihlwa inyanga ezintathu.
“UMaDube uzabekwa emzini wakhe ngoLwesine ekuseni, isidumbu sisemotsha yeTsholotsho. Sithanda ukubonga amapholisa ngendlela abasincedise ngayo lokusukumela phezulu sekuvele udletshana lokuba udadewethu angabe wabulawa.
“Okwakhathesi ababili laba abasolelwa ukuba bambulala sebebanjiwe basezandleni zamapholisa, silethemba bazabhekana lengalo yomthetho.
“Kubuhlungu abakwenzayo kithi, aluba bathatha imali kayise leyo ababeyifuna batshiya umuntu ephila bazihambela lemali,” kubika uMnu Moyo.
Ubuye waveza ukuba okwakhathesi basabhekane lomsebenzi wokuba umuyi abekwe ngesizotha.
“Okwakhathesi sibuthene lapha ekhaya silungiselela ukuba uMaDube alale ngokuthula futhi ngendlela elesizotha.
Ababulali laba sifisa umthetho ubone ukuba bayabhadla ejele.
“Khathesi njengoba sebesezandleni zamapholisa bazalidla njani ilifa lakhona sebevalelwe ejele,” kuphetha uMnu Moyo.
Imizamo yokukhuluma lesikhulumi samapholisa esabelweni seMatabeleland North uInspector Glory Banda yehlule. ucingo lwakhe belukhala lungadojwa.
