Online Reporter
Fungai Muderere
OWAYE ngumdlali wamaWarriors uEsrom Nyandoro uthe uzathwala indleko zemfundo zabantwana bomngane wakhe omkhulu ongasekho emhlabeni, uRichard “Dabuka Express” Choruma.
UNyandoro, owakhula loChoruma eMzilikazi koBulawayo uthe lesi yisinqumo esiphuma enhliziyweni ngenxa yobungane obujulileyo ababelabo.
“UDabuka wayengumfowethu, hatshi nje umngane. Ngizimisele ukuqinisekisa ukuthi abantwana bakhe baya esikolweni baze bafinyelele lapho abafisa ukuthi bafike khona,” kutsho uNyandoro.
UChoruma, owayedume ngokudlala ngomfutho omkhulu phakathi kwenkundla, wedlula emhlabeni mhlaka 29 ngoMpalakazi ka2020, etshiya isikhala esikhulu kubangane, emulini lakubalandeli bebhola.
Waye leminyaka yokuzalwa engu-49.
Isenzo sikaNyandoro sinconywe ngabalandeli abanengi, abathi siyisibonelo esihle sokukhumbula umuntu owaphila ekhonza ibhola ngendlela eqotho.
UNyandoro mhlaka 13 Mpalakazi lonyaka usungule inhlanganiso ye-Esrom Nyandoro Foundation lapho ahlose ukuguqula impilo zabasakhulayo kunguqu lakwezemfundo. Wadlalela iMaZulu kuleli wasuka waya kuMamelodi Sundowns eSouth Africa.
Ebika ngokuphathisa abantwana bakaChoruma, uNyandoro uthe: “Mngane wami, Richard Choruma. Okokuqala, ngiyakukhumbula kakhulu. Okwesibili, ngiyakwazi ukuthi ubungaba ngowokuqala ukusekela iFoundation le.
“Ngakho-ke, ngeke ngivule isikhwama semfundo abantwana bakho bangabi phakathi kwaso.”
Uqhubeke wathi: “Ngivumele ngikhulume mina ngokwami, ngithembise ukuthi ngizakuqinisekisa ukuthi abantwabakho bafunda kuze kube sekupheleni, njengalokho obukufisa.
Ngiyabonga ngokudlala ibhola ngokuzigqaja, ngiyabonga ngokunikela konke ngenxa yomdlalo webhola, kodwa okubaluleke kakhulu, ngiyabonga ngokuba khona empilweni yami. Lala ngokuthula, mngane wami.”
Njenge mizamo yokuthola imali ezasetshenziswa kunhlanganiso yakhe, uNyandoro uthengise enye impahla ayisebenzisa esadlala.
Enye yalimpahla igoqela izikipa esezibize iR50 000.
Isikipa asigqoka engumdlali wamaWarriors kumqhudelwano we-Afcon, sibize iR120 000, loba nje saqala ngokuthengiswa ngeR200 000.
