Vusumuzi Dube
Nkosilathi Sibanda
UMFUNDISI olodumo kuleli, olandelwa ngabanengi, uMphurofethi uBruce Edwards ubika ukuba lonyaka uzagxila ngokuloba ingwalo ehlose ukusindisa abantu lokubancedisa ukuthi basondelele kuNkulunkulu.
Ukhulume lokhu ngesikhathi esethula ugwalo lwakhe olutsha, olulesihloko esithi “40 Days of Prayer and Fasting” olumumethe imfundiso lenkuthazo yokuqakatheka kokuzinikela emkhulekweni lokuzila ukudla.
Ugwalo lolu lulandela olunye olulesihloko esithi “Daily Devotional” oluphethe indikimba yokuphila ngokholo lokuxhumana loNkulunkulu.
Ekhuluma lentatheli yephephandaba likazulu ngoLwesibili, uMphurofethi Edwards uthe ugwalo lwakhe olutsha luzancedisa abantu ukuthi babe lenhloso ngesikhathi bezile ukudla, ukuze bagcwalisise abakufunayo ngokomoya.
“Ugwalo lolu lugxile ekupheni usizo kumakholwa esiKristu nxa ephakathi kokuzila ukudla, lamavesi eBhayibhili okumele bawabale,” kutsho uMphurofethi Edwards.
“Lolu lugwalo olunikeza indlela eyiyo okumele wonke umKhristu ayilandele nxa ezile ukudla. Kodwa, loba ngubani engenelisa ukusebenzisa lolugwalo.”
UMphurofethi uthe uphezulu kokuloba olunye ugwalo olubizwa: “How To Grow Spiritually.”
“Kunengi okuzayo. Amakholwa awalinde olunye ugwalo. Inhloso yethu yikuthi sincedisane kuhambo lwethu lokuzisondeza kuNkulunkulu.”
Online Reporter