Online Reporter
Ethel Ncube
KULENDODA yakoBulawayo ebambise enye izisisila zejuba ngemva kokuhamba laye eTregold, andubana anyamalale labomakhalekhukhwini abane, asuka esithi uyathengisela omantshi kanti uyamqila.
Umsolwa uBenson Ndlovu, ovalelwe esitokisini, uzamiswa emthethwandaba mhlaka 17 kuyonale inyanga esetheswa icala lokutshontsha lokuqila usomabhizimusi othengisa omakhalekhukhwini.
Omakhalekhukhwini abatshontshwayo ngama-Samsung ayematsha futhi kawatholakalanga.
Kuvele ukuthi uBenson walanda usomabhizimusi wambikela ukuba kulabomantshi abafuna omakhalekhukhwini abangu-4. Umnikazi wabomakhalekhukhwini wahamba laye uBenson, bafika bangena bonke eTredgold, wafika wamtshengisa omunye undoda okuthiwa nguCosmas Dube wathi ngumtshutshisi kanti umqambela amanga.
Bamhlalisa esitulweni kwathiwa basahambisa omakhalekhukhwini.
Umnikazi wabomakhalekhukhwini wahlala waze wadela. Uthe ebuza abantu bathi kabambonanga ngoba basebenzisa omunye umnyango.
Umamangala wenelisa ukubikela omunye umcuphi owahle wayithathela phezulu indaba le, wayabamba uBenson esephuma ngomunye umnyango wahle wabotshwa.
UCosmas Dube onguye owayesenikwe omakhalekhwini laba wabaleka, kakabanjwa, uyadingwa.
UBenson ukhangelelwe ukuya emthethwandaba mhlaka 17 esiyakwenza isicelo sebheyili.
