Online Reporter
Ethel Ncube
KULELINYE inina lakoBulawayo elikhala lingathuli kulandela ukubona imota ethengiswayo kuFacebook “layithenga” kanti selizidonsele amanzi ngomsele nanko laqilwa imali engange US$16 000 langayitholi lemota leyo.
Inina leli elileminyaka engu-35, elihlala eHillside, koBulawayo liqilwe imali le ngenyanga kaMabasa.
Kubikwa mhlaka 7 Mabasa 2026, ngehola lika-10 ekuseni, owesifazane lo ohlala eHillside, koBulawayo, wabona isikhangiso kuFacebook esafakwa ngumuntu ongaziwayo, ngaphansi kweqembu elibizwa ngokuthi Quality Import Cars. Lesi sikhangiso sasibika ukuthi kulemota yohlobo lweQuantum ethengiswayo.
Umamangala waxhumana lomuntu ongaziwayo ngeWhatsApp, wathi uyayithanda imota futhi ufuna ukuyithenga. Wasebhadala imali ababeyivumelene i-US$16 031. Ngemva kokuba eseqedile ukubhadala, lowo muntu ongaziwayo wayesefuna enye imali okwabangela ukuthi umamangala aqale ukusola, wala ukuyibhadala.
Kubikwa ebona imali leyo ingasafakwa, umetheswacala wahle wacitsha umakhalekhukhwini wakhe, yikho okwenza umamangala wananzelela ukuthi useqiliwe.
Amapholisa abikelwa, kodwa imali yonke i-US$16 031 ayitholakalanga.
Intatheli ixhumane lobambele isikhulumi samapholisa koBulawayo uAssistant Inspector Thandekile Ndlovu obike ukuba amapholisa asachwayisisa ngaloludaba.
“Amapholisa akoBulawayo athanda ukwazisa umphakathi ukuthi uqaphele kakhulu ekuthengeni izimota loma ezinye impahla ezithengiswa ezinkundleni zokuxhumana.
“Kubalulekile ukuba leqiniso lalowo othengisayo, ukuhlola impahla mathupha ngaphambi kokubhadala imali ebantwini ongabaziyo,’’ kutsho Asst Insp Ndlovu.
