admin
Thokozile Mbedzi
ZILOKHU zinkemile izakhamizi zesigabeni seMadzivhe eBeitbridge ngemva kokuba enye indoda igwaze enye yasala iphethe amathumbu ngezandla kuviki ephelileyo.
Kubikwa uWilson Moyo ugwaze uSamuel Ndou kabili esiswini amathumbu aphuma phandle ngoba engafuni ukuba angene emzini wakhe.
Kuzwakale ukuthi Ndou ubehamba labanye bakhe bebane bevela kumbukiso bezwa irediyo ikhala emzini kaMoyo bangena befuna ukuyazijabulela.
UMoyo akuzange kumphathe kuhle lokho kungakho waqala ukuxabana labo wabagijimisa babaleka kodwa uNdou wehluleka ukubaleka njengabanye uMoyo wamfica wamgwaza kabili esisuswini, amathumbu ahle aphuma phandle.
Omunye wabomakhelwane ekhuluma lentatheli kaMthunywa uMnumzana Boyz Moyo uthe lokhe belesithuli ngesiga lesi.
“UWilson ubesemzini wakhe ngesikhathi amadoda la amane evela embukisweni. Amadoda la abevele eseziphandlelwe ngumaphephethwa engaphandlwanga ngesikhathi edlula emzini kaMoyo besizwa irediyo ikhala ahle aphambuka endleleni angena emzini lo.
“Uhlupho lube yikuthi vele uMoyo kafuni ukuthi abantu bangene emzini wakhe ikakhulu amadoda uyabe secabanga ukuthi bazamthathela unkosikazi wakhe, uvele ulobukhwele.
“UMoyo wahle wabahlangabeza bengena egumeni ethwele ingqamu wathi kabamukelekanga emzini wakhe,” kuchaza uMnu Moyo.
“Abanye babaleka kodwa uSamuel wehluleka ukugijima ngesiqubu wahle wamgwaza kabili esisuswini. Umfowabo nguye owamthwalela esibhedlela seSiyoka lapho abafike bamdlulisela eBeitbridge labo abamdlulisele eUnited Bulawayo Hospitals (UBH) kodwa kukhanya ulokhu esesimeni esingasihle. UMoyo yena wahle wadliwa ngumswenya,” kulandisa uMnu Moyo.
Isikhulumi samapholisa esabelweni seMatabeleland South ulnspector Loveness Mangena ebuzwa ngodaba lolu uthe solufikile ehofisini yabo.
“Udaba lwamadoda amane abesuka embukisweni asengena emzini wenye indoda efuna irediyo umninimuzi wangakuthandi ukuba bangene emzini wakhe solufikile ehofisini lethu ngakho uzulu kazwisisane.
“Sicela njalo kuzulu ukuba ongabe elolwazi lokuthi umetheswacala ungaphi azise amapholisa aseduzane laye kumbe atshaye ucingo,” kuphetha uInsp Mangena.
Online Reporter