Online Reporter
YiNtatheli kaMthunywa
KULOSANE oluleminyaka emibili olufe ngemva kokutshiswa ngamanzi ngesikhathi lufuthiswa ngomsuzwane ngunina nanko beluphethwe yisifuba.
Ukufutha yikugubuzela phakathi kwengubo kulebhavu yamanzi abilayo uhotsha intuthu yamanzi la.
Isikhulumi samapholisa esabelweni seMashonaland East uInspector Simon Chazovachiyi ugcizelele ngesehlakalo lesi.
Isehlakalo lesi kubikwa senzakale mhlaka 15 Ncwabakazi epulazini leFresney eBeatrice.
“Unina wosane lolu uGeorgina Chakaza (30) uthi wayefutha usane lwakhe uDylan Chakaza (2), ngamanzi atshisayo ayelomsuzwane phakathi kwebhavu yepulastiki ukuze usane lwakhe obelulofuba lubengcono. Bathi bephakathi kwengubo, usane lolu lwabamba amanzi atshisayo lwatsha isandla kunye lentamo.”
UInsp Chazovachiyi uthe unina wosane lolu walugijimisela esibhedlela seBeatrice lapho abafika bathi usane selwedlule emhlabeni.
Indaba le yabikwa emapholiseni mhlalokho.
Amapholisa ahamba esibhedlela lesi ukuyachwayisisa. “Ngelanga elilandelayo mhlaka 16 inina leli lamiswa emthethwandaba weBeatrice lisetheswa icala lokubulala.
Ukhangelelwe ukuphenduka emthethwandaba mhlaka 29 Ncwabakazi.
“Sikhuthaza uzulu ukuthi aqaphele lapho esebenzisa amanzi ngoba kungenzeka alimaze kumbe athathe umphefumulo. Amanzi angalimaza angaba ngatshisayo kumbe aqandayo, ngokunjalo kumele abantu baqaphele, njengalapha salahlekelwa ngumphefumulo womntwana,” kutsho uInsp Chazovachiyi.
