admin
Khanyile Ndebele
KUQHUME isililo kwaba losizi kwenye imuli yeBurnside koBulawayo kugalula usane olulomnyaka lengxenye endaweni yokubhukutsha esegumeni ngesikhathi ludlala lomfowabo phandle.
Usane lolu kubikwa ludlule ngoMgqibelo ekuseni.
UMthunywa uzwe ukuthi unina wosane lolu wasuka esiyazivocavoca, watshiya usane lesisebenzi kunye lowesilisa othandana lonina.
Kubikwa umnewabo wosane lolu, oleminyaka eyisikhombisa owayedlala phandle wabiza umnawakhe ukuba badlale bonke phandle okuyikho lapho awela khona phakathi kwendaweni yokubhukutsha le etshona okwamamitha amathathu.
Umfana lo wezwakala eseklabalala esedinga uncedo ethi usane seluwele phakathi kwamanzi. Kubikwa loba bazama ukumkhupha lesithandwa sikanina behluleka ngoba lomzimba wawungasakhanyi.
Ababili laba babiza amapholisa lawo athola usane seluvele selwedlule emhlabeni.
Omele isikhulumi samapholisa koBulawayo uAssistant Inspector Nomalanga Msebele uthe njengamapholisa baxwayisa uzulu ukuthi bananzelele abantwana ngaso sonke isikhathi.
“Abazali kufanele bekhuthaze njalo baqoqonsele amankazana abancedisa ngemsebenzi yendlini ukuthi baqaphele izingozi nxa bekhangele abantwana.
“Sesisondele isikhathi sezulu, abazali kufanele becebise abantwana ukuthi bangadlaleli kuma-swimming pool ngoba sokuyingozi,” kuphetha Asst Insp Msebele.
Online Reporter