Online Reporter
Danisa Masuku
ZIYAKHALA kuqembu leHighlanders nanko owayengumsekeli kamqeqeqtshi u-Agent Sawu usedonsele iqembu kumagqwetha, nanko ufuna ukubhadalwa imali engange-US$6 000, kulandela ukususwa kwakhe emsebenzini, abika ukuba akuzange kwenziwe ngendlela.
Imali le kubikwa ngeyama-signing on fees.
Isivumelwano sakhe leBosso bekumele siphele mhlaka 31 Mpalakazi 2026. USawu labanye abakade bencedisa ukuqeqetsha, basuswe ezikhundleni
kulandela ukuqhatshwa kukaThabo Senong, ovela eSouth Africa, ozabe encediswa nguMkhokheli Dube.
Ngokubika kwabafakazi abaqotho kuloludaba, igqwethwa likaSawu, uVictor Kucherera, oweWallace Law Chambers, ubhalele iHighlanders incwadi, eyazisa ngesikhalazo.
Incwadi le, ebonwe yintatheli, ichaze ukuthi: “Simele uMnumzana Agent Sawu obengumsekeli kamqeqetshi weHighlanders Football Club. Ukhangelisise incwadi elimnikeze yona njalo uyala okumunyethwe kuyo, ekhangele ukuthi ikhontilela yakhe yesulwe ngendlela engafanelanga,” kutsho incwadi le.
Igqwetha libeke kabanzi ukuthi ikhontileka leli lagcizelela ukuthi akusoke kube lokwesulwa kwesivumelwano ngaphandle kuze kufike ilanga lokucina.
Igqwetha uKuruchera uvumile ukuthi ungummeli kaSawu kodwa kazange afune ukutsho okunengi.
Ebuzwa ngalokhu, uSawu uthe: Ngubani okutshele khona lokhu. Akula engingakutsho. Le yindaba yami lalabo abangiqhatshayo. Zama ukuthola okunengi kulo okutshelileyo.”
