Online Reporter
Ethel Ncube
UMHLABELELI weMzansi Afrika odume kakhulu ngokucula Amapiano uzakwethelela esiJahundeni eZimbabwe ngempelaviki ebuyayo.
UScott Maphuma uzandiza afike lapha ngoMgqibelo adlule alubhekise eGwanda eShisanyama lapho azabe elomcimbi khona owe-Amapiano Music Fest.
Umculi lo uzabe esesitikini lomhlabeleli weZimbabwe uMzoe 7 onguye laye ozajabulisa uzulu kumcimbi lo.
Ekhuluma lentatheli umqoqi womcimbi we-Amapiano Music Fest uTapiwa Gandiwa ubikele intatheli ukuba uScott uyeza eGwanda.
“Amalungiselelo omcimbi wokuletha uScott Maphuma ahamba kahle njalo laye usebike ukuba kungaze kuthini uzabe ekhona emcimbini ozakwenzelwa eShisanyama eGwanda.
“Uzafika ngoMgqibelo mhlaka 22 kunyanga kaLwezi emini kuthi ke ntambama ayejayivisa ogweja lomphakathi weGwanda jikelele,” kutsho uTapiwa
Uqhubekele phambili waveza ukuba unxusa wonke umuntu ikakhulu abeGwanda ukuba baze ngobunengi babo.
“Ngiyalinxusa lonke elihlala eGwanda labanelisayo ukuza eGwanda ukuba lize lizokwejisa lilalele njalo libukele uScott Maphuma ngamehlo hatshi ukuba libelitshelwa ngabanye kodwa libuye lizibonele ukuba uhlabela njani.
UMzo 7 laye uzabe ekhona esenza adume ngakho,” kuphetha uTapiwa.
