Online Reporter
Ethel Ncube
IQEMBU le-Rhumba elikhokhelwa nguClement Magwaza lehlelwe liyezi elimnyama kulandela ukwedlula emhlabeni kwelinye ilunga leqembu labo.
USotsha Ntokozo Ncube obetshaya ikatali ye-bass kuqembu likaMagwaza udlule emhlabeni ngoMvulo esibhedlela sakoBulawayo.
Intatheli ixhumane loMagwaza onguye obesebenza loSotsha obike ukuba balusizi ngokufa kwakhe.
“USotsha Ntokozo udlule emhlabeni ngoMvulo esibhedlela ngemva kokugula phose inyanga ezimbili. USotsha ubetshaya ikatali ye-Bass thina besimbiza ngokuthi ‘Big Dara’ ngoba ubeyindoda elunge kakhulu njalo ubengumuntu obehlala ehleka ngasosonke isikhathi.
“Ngileminyaka engu-15 ngisebenza laye sisebenze kuhle kakhulu eminyakeni le engu-15 sisonke sibambisana ndawonye siliqembu. Siliqembu leMacrey silahlekelwe ngokudlula emhlabeni kukaSotsha sikhala kanye lemuli yangakibo,” kubika uMagwaza.
Uqhubekele phambili eveza ukuba amalungiselelo omngcwabo kaSotsha asezingeni eliphezulu.
“Amalungiselelo omngcwabo kaSotsha asaqhutshwa, asikabi lelanga eliyilo eliqondileyo.
“Mhlaka 8 Lwezi sizabe sisePalace lapho ebesihlele khona umcimbi wokwethula idlalade lethu elitsha, njengoba sokube lomonakalo lo, sizahle sithathe lelothuba ukuba simhloniphe ndawonye labalandeli bethu,” kuphetha uMagwaza.
