Online Reporter
Ethel Ncube
UMAHLEKISA wePlumtree osedume kunkundla zokuxhumana usethole ukunanzelelwa kanye lodumo ngokukhethwa ukuba abe ngummeli (brand ambassador) wenye inkampani eMzansi Afrika.
UMaxwell Dliwayo owazakala ngokuthi nguKing Zuzaphi uzalwa koZuzaphi, ePlumtree. UKing Zuzaphi waziwa kakhulu ngokuphosa amavidiyo kunkundla zokuxhumana ehlekisa abantu ngamafutha awagcobayo.
Uphakanyiswe yinkampani ebizwa ngokuthi Unique Glow kulandela ukuthethiswa ngabantu enkundleni zokuxhumana besola ukuthi wenza amahlaya ngokuthi ugcoba amafutha enza ijwabu lakhe libemhlophe.
Intatheli ixhumane loPromise Sibanda osebenzisana loKing Zuzaphi othe bayajabula ngalumsebenzi uKing Zuzaphi asewutholile.
“Siyamhalalisela uKing Zuzaphi sijabula ndawonye laye. Abantu bebemthuka ngokwenza ihlaya lakhe lokuthi uyagcoba amafutha amguqula ijwabu. Abantu kulokuthi babuke abanengi bebemthuka bemthethisa ngenkalakatha zenhlamba okuyinto ebingacina imlimaza ekuhlekiseni kwakhe.
“Esikufundileyo yikuba abantu bayakuhleka bakuthethise kanti sebekunika izibusiso. uKing Zuzaphi usezathathwa ngabe-Unique Glow abathengisa amafutha okugcoba abengu-brand ambassador.
Siyamhalalisela njalo siphinde sikhuthaze abantu abenza okokuhlekisa abantu ukuthi uhambo lwakhona lunzima, kumele uqinisele ukuze kukulungele,” kubika uPromise
Ekhuluma lentatheli uKing Zuzaphi ubike ukuba yonke yinto ilesikhathi.
“Mina nje bengizihlekela ngitshela abantu ngamafutha engiwagcobayo, abantu baqala ukungisukela bethi ngiyagcobisa kanti mina nje angikho lapho ekugcobeni ukuthi ngihlube isikhumba. Imibono efakwe ngabantu ngami ihle yangenza ngaphakama kakhulu. Imibono emihle lemibi ngami ngiyayamukela njalo yisikhathi sakhona, yonke into ilesikhathi sayo.
“Mina ngilodumo nje ngedwa ngokuhlekisa abantu kuphela sizikholisela, angikho emculweni kodwa ekuhlekiseni uzulu. Mina ngiyazigcobela amafutha manje abantu sebengisukela bathi ngiyagcobisa.”
“Ngibonge usekelo engiluthole kuUnique Glow sebengenze u-brand ambassador wabo, ngiyabonga kakhulu ngokuphakanyiswa,” kuphetha uKing Zuzaphi.
