Online Reporter
YiNtatheli kaMthunywa
ABANTWANA abathathu abatholakala befile ebhuthini yemota eKuwadzana Extension ngoLwesihlanu kuviki ephelileyo babekwe ngoLwesibili.
Izelamani uAnenyasha (1) loAnopaishe Muzanangu (4) babekwe esiqintini seJanyure Village, eMasvingo. Kukanti omunye owakomakhelwane uReynold Matsiwe (3) ubekwe esiqintini seChiunze Village, e-Uzumba, eMurehwa.
NgoMvulo kwenziwe inkonzo yesikhumbuzo imuli lezi zombili zihlangene eNyaradzo Funeral Services eseWillowvale Road eHarare.
Impumela yenhlolisiso yezidumbu zabantwana abathathu laba ilokhu ilindelwe.
Kwaba lusizi, kwadabuka inhliziyo zabazali labomakhelwane ngesikhathi kutholakala izidumbu zabantwana abathathu, phakathi kwe-boot yemota, eKuwadzana Extension eHarare.
Abantwana laba abangabafana, bacina ukubonakala bedlala mhlaka 1 Mfumfu, kwabikwa ukuthi banyamalele, badingwa baze batholakala ngoLwesihlanu mhlaka 3 Mfumfu bevalelwe ku-boot yeMercedes Benz e-car park.
Imota le kayihambi njalo kwakukade yapakwa lezinye kulindawo.
Izidumbu zatholwa ngelinye inina eliyisakhamuzi, ngokuzwa uphunga elibi emoteni, kwavela ukuthi mhlawumbe babulawa yikuswela umoya wokuphefumula. Ukunyamalala kwabo kwabikwa, kwagcwala enkundleni zokuxhumana, kubalisela lakuWhatsApp.
Kwasekucatshangelwa ukuthi bathunjwa.
Kodwa-ke, uBynet Bunu, umaneja we-car park, uthe:
“Ubaba wabantwana ababili abafileyo wangitshayela ucingo engitshela ukuthi abantwana balahlekile. Sabe sesiqala ukudinga, saqala izimoteni lasemabandleni aseduzane. Asizange sizwe imisindo kumbe ukukhala ngaleso sikhathi.
“Sikhangele zonke izimota ngamathotshi. Sithe sisaphenya ngezwa abantu bethi sebezibonile izidumbu. Abantwana laba babedlala lomunye umuntu, othe zasuka kuye, kwaba yikunyamalala kwazo. I-boot lemota kutsho ukuthi lalivale nci.”
Omunye umakhelwane uthe uNkosikazi Musungwe uthe baqala becabangela ukuthi bathunjwa.
“Kubuhlungu lokhu. Sithandazela ukuqina. Loba kuyisenzo sobubi kumbe ingozi, konke sikutshiya kuNkulunkulu. Ekuqaleni, abantu babethi bakhangelisisa i-boot lemota, okuyikho okusimangalisayo.”
Abanye bathi mhlawumbe kulomuntu olesandla.
“Nxa kulomuntu olesandla, umthetho kumele usebenze,” kutsho uJona Chikonanyika.
Isehlakalo lesi sifana lesinye esake senzakala eSouthlea Park lapho okwaba labantwaba abatholakala befile kulandela ukuvalelwa phakathi kwemota.
