Online Reporter
Ethel Ncube
KULOSOBHUKU weBikita oleminyaka engu-35 osolwa ngokuba lobudlelwano bothando lentombazana eleminyaka engu-15 yokuzalwa.
Umantshi weMasvingo, uInnocent Bepura, kule iviki ugwebe uStelen Makomo ongusobhuku ukuthi ayepika iminyaka emithathu ejele ngenxa yokudlwengula umntwana omncane.
Umtshutshisi kulelicala uveze ukuthi omunye umfakazi wabona umamangala elegazi esikipeni lasemathangazini ngemva kokuba umsolwa emdonsele entabeni wamdlwengula.
Esethula isigwebo, uMantshi Innocent Bepura uthe usobhuku lo, njengomkhokheli wesigaba bekumele abe yisibonelo esihle emphakathini.
Umtshutshisi uPrecious Takuva ubike ukuba usobhuku wafika wadonsa intombazana le wayayidlwengula entabeni.
“Mhlaka 21 Ncwabakazi 2025, emini, umamangala wayehamba labangane bakhe besiyatheza inkuni. Umsolwa wabathola betheza, wasedonsa umamangala waya laye entabeni eseduze. Abangane bakhe basuka bahamba besithi kumbe uzabalandela.
“Umsolwa walalisa umamangala phansi ngomhlane, wamhlubula izigqoko wamdlwengula kanye. Abangane bakamamangala bathi bambiza kodwa umsolwa wakhupha ingqamu wamethusela ngokumbulala ukuthi angabaphenduli,” kutsho uTakuva.
Umantshi Mnu Bepura uthe ubufakazi buveza ukuthi umsolwa wahlangana lomntwana oleminyaka engu-15 emacansini.
“Njengosobhuku bekulindeleke ukuthi wazi amasiko njalo ukhuthaze umphakathi ukwenza okuhle, kodwa wena ukhethe ukona umntwana oleminyaka engu-15.
“Lesi yisenzo esibi kakhulu, umphakathi kawukulangazeleli lokhu, ngakho ufanelwe yisigwebo sokuyahlala ejele,” kuphetha uBepura.
