Online Reporter
Ethel Ncube
KULOSOBHUKU weZvishavane ogwetshwe ukuyapika iminyaka engu-17 emthethwandaba weZvishavane kulandela ukudlwengula elinye inina elihlala esigabeni sakhe ngeviki ephelileyo.
Ngokutsho kwesitatimende esifakwe ngabeNational Prosecuting Authority (NPA) enkundleni zokuxhumana, umsolwa uleminyaka engu-40 yokuzalwa njalo wadlwengula inina elileminyaka engu-23 ayehambe lalo besiyakhangela amabele asentshenziswa ekuceleni izulu.
Kubikwe ukuba mhlaka 18 Mpandula emini umsolwa wahamba kubaba kamamangala wamtshela ukuba amabele asomile, sekumele acholwe.
Umamangala wasethunywa nguyise ukuba ahambe losobhuku ayechola amabele lawo. Bathe befika ngekhaya usobhuku ebona kungelamuntu, wahamba lomamangala endlini wafika wamfuqela phansi wamdlwengula.
Uthe eqeda ukumdlwengula umamangala wahamba wayachola amabele, kabikelanga muntu.
Uyise kamamangala waqalisa ukubona umntwana engasajabuli njengenjwayelo wakhuluma lonina womntwana ukuthi ambuze ukuthi angabe ehlutshwa yini.
Umamangala wathi ebuzwa ngunina wahle waveza ukuba usobhuku umbambe iganyavu okwabangela ukuthi bayemmangalela amapholiseni andubana abotshwe.
