admin
Cornelius Luphahla
LOKHU zikhuza umhlolo njalo zitshwaqe umzimba izakhamizi zesigabeni seSihlengeni budebuduze ledolobho lakoBulawayo ngemva kokuba kukhitshwe inkalakatha yenyoka ebigqokiswe iphenti emsileni emzini womunye usomabhizimusi wakule indawo.
Kucatshangelwa ukuthi inyoka le ibingeyokuthuthukisa ibhizimusi kaMnumzana Gibson Mthethwa.
Imbedumehlwana le yenzakale kuyonale iviki esiqintini esingaphansi kukasobhuku uAmos Ncube.
Usomabhizimusi lo olemitshova kucatshangelwa ukuthi ibhizimusi yakhe le ibihamba kuhle ngenxa yenyoka le ebibekela.
UMthunywa ukhulumisane lesinye isakhamuzi sakule indawo uNkosazana Silibaziso Ndlovu ochaze ukuthi wayekhona mhla kukhitshwa inyoka le.
“Ngangikhona mhla kukhitshwa inyoka le njalo kwakungasinyoka yokudlala. Okwangimangalisayo yikuthi inyoka le yayigqoke iphenti elimnyama tshu njalo iphila. Ekukhitshweni kwayo abaphurofethi bayigijimisa kakhulu baze bayayibambela endlini kodwa kuthiwa yayihlala emtshoveni wakhe,” kutsho uNkszn Ndlovu.
Uqhubekele phambili njalo wachaza ukuthi umnikazi wenyoka wavuma ukuthi ngeyakhe waze wayivalelisa.
“Ebuzwa ngale inyoka uMthethwa wavuma ukuthi ngeyakhe njalo waqhunsa isililo ethi ibhizimusi yakhe yokutshovisa kayisaphumeleli njalo lomtshova wakhe awusafi wavuka ngoba abaphurofethi sebemphoxile.
“Kwathi isitshiswa inyoka wathi kayihambe kuhle labantwabakhe ngoba ilamaqanda,” kulandisa uNkszn Ndlovu.
UMnumzana Meluleki Moyo uchaze ukuthi umnikazi wale inyoka wabuya wathi inyoka yakhe ihambe ingakhululekanga.
“UMthethwa watshela umphakathi ngelanga kukhitshwa inyoka le wathi ihambe ingakhululekanga ngoba kayisavalelisanga umtshova wayo eyawuthengayo njengoba ubuyelungisiswa koBulawayo,” kutsho uMnu Moyo.
Kuzwakale njalo ukuthi inyoka le yiyo eyayibulele umtshova lo uze uyelungiswa koBulawayo ngoba isizondele ukuthi umnikazi kasayiphi ngendlela ukudla kanye lemali.
Ebuzwa ngale indaba uMnumzana Gibson Mthethwa uvumile ukuba kulenyoka eyakhitshwa emzini wakhe.
“Kuliqiniso sibili ukuthi kulenyoka eyaphuma emzini wami, lami nginje angilankani ngayo. Noma kunjalo angazi ukuthi ngekabani mhlawumbe yatshiywa ngabazali bami. Ngokubona kwami kuliqiniso sibili ukuthi kungabe kuyiyo eyabulala umtshova wami engilokhu ngiwulungisisa koBulawayo.
Ebuzwa ngokuthi inyoka le yayigqokiswe iphenti uMthethwa uthe kazi lutho ngakho lokho.
Online Reporter