Online Reporter
Nkosilathi Sibanda
KUZAGCWALA phamu endaweni yokuzithokozisa eSidudla Beer Garden, eNjube ngesikhathi umculi wodumo wakuleli uHwabaraty ezekwethula idlalade.
Umhlabeleli lo ukhethe ukubuthanisa uzulu eNjube ngoba yikho akhulela khona, njalo uthi lokhu kuzakuba yisitshengiselo sokubonga umphakathi wakulindawo.
Idlalade leli, elibizwa ngokuthi Amandla livezwa mhlaka 21 Mpandula.
“INjube likhaya lami, lapho engaqala khona. Ukwethula idlalade lami kulindawo kuyindlela yokubuyisela emphakathini owangikhulisayo lokukhuthaza intsha ukuthi loba ukhulele elokitshini, kukhulu ongakwenza, ucine usufinyelele enkundleni ezinkulu emhlabeni.
“Idlalade lihambisa umlayezo wokuthi silamandla lokuzigqaja. Liphakamisa njalo umphakathi lokuxhumanisa abantu,” kutsho uHwabaraty.
Ingoma eziphekwe nguHwabaraty kulelidlalade zigoqela ethi Kabakhulume, Juba, Amandla, Ndodana, Umfula, Intabezikude, Kanye Kanye, Madonna, Njalo lo Thina Siyakhala.
Umhlabeleli lo usebenze labanye abaculi abagoqela uRosalie kungoma ethi Intabezikude, waphinda wacula eyisihloko sedlalade loMnqobi Yazo. Abanye abaculi ababeka amaphimbo nguSisa (Umfula), Udonsi Lwabapostoli (Ndodana) loFish F Ndaramu kuMadonna.
Umculi lo uselamadlalade ayisithupha.
Amanye amadlalade ngathi: Ekas’Lam, Woza Nhlanhla, Isilwane, Umqakezeleni, lethi Jelimana.
UHwabaraty, osanda kuqhunsa enkundleni zeCanada lase-United Kingdom, uthe ubonga ukusebenza kwakhe lama-studiyo abalisela iRockup Studios yakuleli, Niso Productions (Zimbabwe/ Canada, Mabala Noise (South Africa).
Liphethwe ngu-producer wodumo uThembani Zozo Phakathi.
