Online Reporter
Innocent Kurira
NGEMVA kweminyaka engamatshumi amabili, umjaho omkhulu weBulawayo Half Marathon usuphendukile.
Umjaho lo kubikwa uzasekelwa yinkampani yeBaldmin Holdings njalo kukhangelelwe ukuthi uqhutshwe mhlaka 19 Mabasa enkundleni yeWhite City.
IBaldmin Holdings izimisele ukuthi ixhase umjaho lo ngesilinganiso esingamatshumi ayisikhombisa ekhulwini, okuyikho osekujabulise labo abazancintisa kunye labaphathi bomdlalo kunhlanganiso yeBulawayo Athletics Board (Bab). Lumjaho ubaluleke kakhulu kumidlalo kulelidolobho ngoba lezakhamizi zizaphathisa ekuqhutshweni kwawo.
Ukuphenduka kwalumncintiswano kube ngumkhankaso kaThemba Mhlophe ongusaziwayo kwezokugijima elizweni.
UMhlophe uzaphatha isikhundla sokuqondisa umjaho njalo ubike ukuba uphiwe imvumo yikhansili yakoBulawayo yokuthi kusetshenziswe inkundla yeWhite City.
Uthe balokuthokoza ukuthi bathole usekelo oluvela kunkampani yeBaldmin Holdings.
“Siyajabula ngokusondelelwa yiBaldmin Holdings njengabaxhasi bethu abakhulu. Usekelo lwabo luncede ukuthi senelise ukuqoqa okunengi silungiselela umncintiswano. Umjaho lo ubaluleke kakhulu ngoba uhlanganisa abantu,” kutsho uMhlophe.
Kuncintiswana kumbango ye-21km, 10km le-5km njalo kuzancintisa lalabo abahamba ngama-wheelchair. Abafuna ukuncintisa kubikwa bazabhadala i-US$15. UMhlophe uthe ukubhalisa ukugijima kwavulwa mhlaka 15 Zibandlela. Kuzavalwa mhlaka 15 Mabasa.
Uthe abazabhalisa masinyane bazaphiwa isikipa lekepesi kuthi abangu-500 abazaqeda umjaho bazathola imendulo. Imvuzo yemali ibalisela i-US$500 kulo ozatshaya intambo kuqala. Ozalandela kunombolo yesibili uzaphiwa i-US$400, owesithathu US$300.
Usukelo lweBaldmin Holdings luyibufakazi bokuzimisela kwayo ukuphathisa kunhlelo zokuphakamisa umphakathi kwezemidlalo. Ukuphatheka kwayo kwezokugijima kuphinde kwaletha ukuziqhenya kulelidolobho.
Njengoba umjaho ususondele, kukhangelelwe ukuthi kuncintise abantu abedlula i-500.
Phezulu kosekelo lweBaldmin Holdings, abaqoqi bomncintiswano basebenze ndawonye lekhansili yakoBulawayo, Amapholisa lezakhamizi.
