Online Reporter
Nkosilathi Sibanda
UMCULI wakuleli osehlala kweleSouth Africa, uThembalenkosi Moyo, ubika ukuba uzimisele ukuhlabela ingoma ezigxile ekuphakamiseni abantu ukuze baphile impilo engcono.
UMoyo uveze lokhu ngesikhathi etshela iphephandaba likazulu ukuthi uzakwethula ingoma yakhe entsha ngelanga lokunanza izwekazi le-Africa ngoMvulo.
“Sengibuye lengoma entsha ethi Ndikhuze/Ngikhuze, elomyalezo okhuluma ngothando, ukubekezela, ukuxolelana lokunika abantu amathuba,” kutsho uThembalenkosi ekhuluma eseMzansi
Ingoma le ekhitshwe mhlaka 25 Nkwenkwezi, nge-Africa Day, yethulwe ngesikhathi abantu abanengi abathandanayo sebekhetha ukwehlukana loba ukuthukuthela kulokukhulumisana.
Uthe ingoma le ikhuluma ngabantu ababili abathandanayo kodwa abavame ukona uthando lwabo ngokucaphuka lokwehluleka ukukhulumisana.
“Ndikhuze/Ngikhuze yingoma ekhuluma ngokuxolelana, uthando, amathuba esibili, ukubuyisana, ukuzinikela lokulondoloza ubudlelwano.
“Ikhuluma ngabantu abathandanayo kodwa abaphanga bathukuthele behlukane masinyane,” kutsho uThembalenkosi, obika ukuba wafundiswa ukucula nguGog’ Bekezela.
Uthe injongo yengoma le, yikunxusa abantu ukuthi bakhethe ukukhulumisana kulokutshiya abanye besezinhlungwini.
“Umlayezo wami uthi abantu bangapheli amandla kodwa bakhulume ukuze uthando luqhubeke luvutha.
Uthe kulingoma wasebenza lengcitshi zabapheki bomculo u-Orlando Roland Moyo loTshepo Nobela. Uthe ingoma le iletha umdumo we-Afro-pop ogcwele imizwa, indaba ezithinta impilo yabantu.
Ukukhitshwa kwengoma yakhe kwengeza kwezinye ingoma alazo ezigxile kundikimba efanayo.
“Inengi lezingoma zami zikhuluma ngothando. Ngake ngakhupha ingoma ethi Power of Love. Ngithanda ukucula ngothando ngoba kuyinto ethinta abantu abanengi.
“Ngicula ingoma ezifundisa abantu indlela yokuphila ngokuthula lokuthandana. Ngikhuthaza abantu ukuthi balalele umculo wami ngoba uthwala imilayezo eqakathekileyo.”
Kwenye ingxoxo ayenze lephephandaba likazulu phambilini, uThembalenkosi waveza ukuthi uthando lwakhe lomculo lwaqala esesemncane.
“Ngaqala ukucula ngisafunda eMgombane Primary School ngaphambi kokuthi ngiqinise ithalenta lami. Ngafundiswa kakhulu nguBothwell Nkomo, owaziwa ngokuthi nguGog’ Bekezela emculweni, owaba lesandla esikhulu ekukhuliseni ithalenta lami.
“Sekuyisikhathi eside ngisakha ibizo lami kwezomculo emazweni aseSouthern Africa ngomculo we-Afro-Pop. Ngisebenzisa njalo lamakhasi obulembu ukuze ngandise abalaleli bami ezigabeni zonke. Lonyaka ngizabuya ekhaya ngizokwethula umsebenzi wami njalo ngisebenze labaculi beZimbabwe ngenjongo yokwandisa umthelela wethu emphakathini,” kutsho uThembalenkosi.
