admin
Yintatheli kaMthunywa
KWEHLE ifu elimnyama kumuli yakoBhebhe eMtshede eSigodini ngemva kokutholakala kwelinye ilunga lemuli le, lifile emgodini kulandela ukunyamalala kwalo liqeda kubeka uninazala.
Insindabaphenduli le yenzakale kuviki edluleyo, lapho uNkosazana Beauty Moyo asuke esililweni sikaninazala kodwa kwangazakali ukuba uqonde ngaphi waze wayatholakala emgodini efile, uMthunywa ukuzwile lokhu.
Ekhuluma lentatheli uMnumzana Nkululeko Bhebhe, umkaNkosazana Moyo uveze ukudana okukhulu ngendlela umkakhe adlule ngayo emhlabeni.
“Besesilamalanga simdinga umama lezinye izakhamizi singamboni. Kuthe izolo wabonakala emgodini evele esezithulele.
“Ngikhuluma nje khathesi (ngoLwesine) bazama ukuba bamkhiphe emgodini, baxotshe abantu bathi kabasuke eduzane ukuze akhutshwe umzimba ube susiyahlolwa ukuba angabe ebulewe yini. Okwakhathesi sizalinda impumela ezavela kubodokotela,” kubika uMnu Bhebhe.
UMthunywa uxhumane losobhuku wakule indawo uMnumzana Lusaba oveze ukuba balesithuli ngokubhubha kukankosikazi kaBhebhe.
“UMaMoyo besilokhu sisabalele simdinga singamboni, wasuka emfeni kuqedwa kubekwa ugogo womkakhe wahamba wangabonakali ngakho saqala ukumdinga watholakala emgodini obucwadlana nje lomuzi wakhe esethule,” kuphetha uMnu Lusaba.
Online Reporter