Online Reporter
Ethel Ncube
KULENDODA yeZaka eBinduko ngaphansi kwenduna uNyakunhuwa emangalise izakhamizi nanko phela itshaye yabulala umzalwane enkonzweni kulandela ukungezwani okubekhona phakathi kwayo lenye indoda.
USam Togara (33) usolelwa icala lokubulala uEmmanuel Shanganai (23) ngemva kokungazwani thize. Ababili laba abalabuhlobo kodwa bahlala esigabeni esisodwa.
Kubikwa kwaba lokungazwani phakathi kukamsolwa lalo osengumuyi besenkonzweni yeZCC ngeSonto, ngezikhathi zantambama. USam wadobha ugodo watshaya uEmmanuel ekhanda wawela phansi wahle wafa. USam kubikwa wahle wadliwa ngumswenya. Abanye abazalwane ababekhona enkonzweni bathi sebebona sokulomonakalo badobha ucingo batshayela amapholisa eZaka wona afika ngokuphangisa kodwa athola uEmmanuel engasekho. Athwala isidumbu sakhe asisa esibhedlela seNdanga.
Intatheli ixhumane lesikhulumi samapholisa eMasvingo uInspector Kudakwashe Dhewa obike ukuba indaba enjalo yenzakele.
“Sibophe uSam Togara osolelwa icala lokubulala uEmmanuel Shanganai enkonzweni. Okwakhathesi uncedisa amapholisa ukuchwayisisa ngecala leli. Umzimba kaEmmanuel usesibhedlela seNdanga lapho ozahlolwa khona imbangela yokufa kwakhe. Sikhuthaza uzulu ukuba nxa ethe waba lohlupho adinge omunye owesithathu ongaxazulula inkinga leyo kulokulwa. “Sithanda njalo ukuxwayisa uzulu ukuba atshiyane lomkhuba wokulungisa uhlupho ngobudlwangudlwangu kodwa adinge abadala benkonzo nxa bethe bangenelisi ukuba bazwanane ukuze babancedise ukulungisa uhlupho abalalo kulokuthi balimazane kumbe kulahleke umphefumulo,” kubika uInsp Dhewa.
