admin
Thokozile Mbedzi
ZILOKHU zinkemile izakhamizi zesigabeni seZimuto eMasvingo ngemva kokuba enye indoda itshaye umzukulu wayo nge-solar panel wafa kuviki ephelileyo.
Kubikwa amalunga emuli yakoHarry ayehlangene ukuze axoxisane ngokuziphatha kukaRobson Harry oleminyaka engu-49 kuze kwenzakale isehlakalo lesi.
Kubikwa abadala bathi belokhu besakhuluma laye uRobson, wasukuma wahamba okwenza uClever Harry wamlandela kanti yayisiwuchithile umuthi inkonyane ngoba uRobson wahle wadobha i-solar panel wamtshaya ngayo.
UClever kubikwa wahle wathi daca phansi wafa.
Ekhuluma lentatheli kaMthunywa uNkosazana Emelia Nhliziyo uthe lokhe bengelankani ngesenzo sikaRobson.
“Amalunga emuli yakoHarry ayehlanganise amakhanda becabanga ukuthi mhlawumbe uRobson ulohlupho kungakho babefuna ukumncedisa.
“Ngesikhathi abadala belokhu besakhuluma laye wasukuma wanxapha wafulathela. UClever wasukuma wamlandela ezama ukuthi amtshele ukuba angaze adelela abadala kodwa yena wahle wacunuka wamtshaya nge-solar panel,” kutsho uNkszn Nhliziyo.
Isikhulumi samapholisa esabelweni seMasvingo ulnspector Kudakwashe Dewa ebuzwa ngodaba lolu uthe solufikile ehofisini yabo.
“Amapholisa eZimuto achwayisisa udaba lwendoda ebulele elinye ilunga lemuli.
“Njengamapholisa sithanda ukuxwayisa uzulu ukuthi nxa kulabantu abakhanya bengasaphathekanga kuhle engqondweni babase esibhedlela ukuze bayehlolwa kulokuthi babagcine ngekhaya ngoba kwezinye izikhathi kucina kuyingozi empilweni zalabo abahlezi labo,” kuphetha uInsp Dewa.
Online Reporter