admin
Cornelius Luphahla
ITHITHIBELE imuli yakoNcube esigabeni seDlawa eNkayi ngemva kokuba elinye ilunga lawo litshaywe yimpama elingazange liyibone ukuthi ngekabani livela chakisa inkomo ekuseni lahle lahlaselwa ngumkhuhlane wengqondo.
Isiga lesi senzakale ngoLwesithathu kuviki ephelileyo lapho uMlamuleli Ncube othe evela chakisa inkomo zakhe watshaywa yimpama angayibonanga okubangele ukuthi atsheke umlomo njalo aphambane ingqondo.
Omunye wezihlobo zikaNcube, uNkosazana Silethemba Mabhena, ubikele intatheli ukuthi nguye owathola uNcube esanda kutshaywa yimpama le.
“Mina ngangihamba ngilandela uNcube ngisiya kumkakhe ngamuzwa ehlaba umkhosi ngambona esiwa phansi.
Ngagijima ngaqonda kuye ngamthola sewele phansi ngambuza ukuthi kuhamba njani wathi utshaywe ngumuntu ngempama kodwa yena kazange wambona ubone impama kuphela.
“Into eyangimangalisayo yikuthi lami umuntu wakhona owamtshayayo kangimbonanga njalo uNcube wayengasenelisi ukuvuka setsheke lomlomo.
Ngasuka-ke ngayabikela umkakhe lezinye izihlobo sayamthatha,” kutsho uNkszn Mabhena.
Esinye isakhamuzi sakule indawo esithande ukubizwa ngokuthi nguDube sichaze ukuthi uNcube engabe etshaywe ngondofa besinye isakhamizi owake waxabana laso.
“UNcube kufanele ukuthi watshaywa ngondofa besinye isakhamuzi salapha oxabane laso kuviki ephelileyo.
Ngokubona kwami yiso sibili esimtshayisileyo ngoba siyaziwa ukuthi silabondofa esayala labo o-tsikamutanda befuna ukubakhipha,” kutsho uMnu Dube.
Ekhuluma loMthunywa uMnumzana Lyton Ncube ongumfowabo kaMnu Mlamuleli Ncube uveze ukuthi lokhu ethithibele ngalesisiga esibehleleyo.
“Ngilapha lokhu ngiphelelwe ngesiga esehlele umnawami, kangazi ukuthi kuhlolani.
Noma nje sisazama ukumelaphisa ebantwini kodwa ngithithibele sibili ngoba umuntu ngeke atshaywe yimpama engayiboni ahle ahlanye.
Kutsho ukuthi utshaywe yizinto zabantu asazi ukuthi bambangisani,” kutsho uMnu Ncube.
Online Reporter