Online Reporter
YiNtatheli kaMthunywa
LOKHE zisatshwaqe imizimba izakhamizi ze-Eastview Area 10 eMabvuku njengoba kuvela imbiko emitsha ngemva kokufa kwengane ezimbili zitshiswa nguyise kusehlakalo okusolwa ukuthi sibangelwe ludlakela phakathi kwezimuli.
Omakhelwane lokhu besehluleka ukwamukela okwenzakale ngoMvulo ekuseni.
Amalunga omdeni athe bekungela mpawu ebeziveza ukuthi imuli ingabe ibhekane lobunzima.
“Bafika emzini wami bezocela imithandazo ngaze ngabanika imbambayila. Babengakhanyi njengemuli elenkinga. Ngamangala sengisizwa ukuthi uGift ubulele abantwabakhe wabuye wabatshisa baba ngumlotha,” kutsho umalume wezingane, uMnu. Leonard Chinyakwa.
Izihlobo zikholwa ukuthi kungenzeka ukuthi umsolwa ubebhekene lenkinga.
“Ubehlala ethule futhi engakhulumi lanoma ngubani. Ngicabanga ukuthi kukhona obekutshaya amanzi kodwa kazange athande ukuthi akhulume ngakho,” kutsho udadewabo kamsolwa, uNkosazana Joyce Sani.
Ngokutsho kwamalunga omdeni, umsolwa wahlasela unkosikazi wakhe, uTsitsi Zuze (22), ngaphambi kokuthi abulale abantwababo.
“Ulenxeba elitshonayo ekhanda elingangena iminwe emine. Yinhlanhla ukuthi uyaphila,” kutsho uMnu. Chinyakwa.
Ngemva kokulinyazwa, uZuze kubikwa wahamba umango omude ngenyawo esiyadinga usizo ngakibo.
Unina kaTsitsi, uNkosikazi Mariah Chinyakwa, uthe indodakazi yakhe yafika ebusuku isesimeni esibi.
“Wafika phakathi kobusuku egcwele igazi. Wathi umkakhe usebulele abantwababo wabuye watshisa izidumbu lokuthi yena ulimele. Wayengaselamandla sahle samgijimisela esibhedlela ukuze ayekwelatshwa.”
Lesi sehlakalo sitshiye izimuli zombili zidinga impendulo njengoba amapholisa eqhubeka ngophenyo lokuthola imbangela yesenzo lesi.
Isehlakalo lesi siveza sobala ububi lodlame lwezimulini kanye lokubaluleka kokuxazulula izingxabano zomdeni ngokuthula.
