Online Reporter
Mashudu Netsianda
AMALUNGISELELO omkhosi wokunanza amaqhawe elizwe oweHeroes Day kanye lowokunanza amabutho elizwe oweDefence Forces Day alonyaka asefinyelele esigabeni esiphezulu, njalo
uHulumende uthi konke okumayelana lokuhlelwa kwemicimbi le sekusezingeni elifaneleyo ukuze imikhosi le iqhutshwe ngempumelelo.
IHeroes Day izananzwa mhlaka 10 Ncwabakazi, kuthi iDefence Forces Day inanzwe mhlaka 11 Ncwabakazi.
Ekhuluma lentathelizindaba ngemva komhlangano weKhabhinethi izolo, uNgqongqothe uMphathintambo Wezokwethulwa Kwendaba, Ukukhangisa lemisakazo, uDokotela Zhemu Soda, uthe
uHulumende usephethe amalungiselelo okucina okuphathwa kwemikhosi le elizweni lonke, ezabelweni kanye lezigaba, ngenhloso yokuqinisekisa ukuthi amaqhawe lamaqhawekazi alwela inkululeko yelizwe ananzwa ngendlela efaneleyo.
“IKhabhinethi yamukele umbiko ophathelane lamalungiselelo omkhosi weHeroes Day loweDefence Forces Day ka-2026, ezaphathwa mhlaka 10 lo-11 Ncwabakazi ngokulandelana. Isizwe siyaziswa ukuthi amalungiselelo alemicimbi yomibili asefinyelele esigabeni esiphezulu,” kutsho uDokotela Soda.
Uthe umphakathi uyaziswa njalo ukuthi amalungiselelo ezokuthutha kanye lezokuphathwa kwemikhosi ayaqhubeka kuzo zonke izigaba zikaHulumende ukuze kuhlonitshwe amadodana lamadodakazi elizwe anikela ngempilo zawo ngokuzimisela ekulweleni ukukhulula iZimbabwe.
Ukuze izihlobo zamaqhawe lamaqhawekazi elizweni lonke zibe lengxenye yemikhosi le, uDokotela Soda uthe uHulumende uzasebenzisa amabhasi angu-162 ukuthwala abantu laba besiya ezindaweni lapho okuzakwenzelwa khona imikhosi le.
Uveze njalo ukuthi umkhosi weHeroes Day walonyaka uzabe uqhutshwa ngaphansi kwesihloko esithi: “Lest We Forget”, njalo umkhosi omkhulu uzabanjelwa eNational Heroes Acre eHarare, kuthi eminye imikhosi iqhutshwe kuwo wonke amaProvincial Heroes Acres alitshumi kanye lamaDistrict Heroes Acres angu-60 elizweni. UDokotela Soda unxuse bonke abantu beZimbabwe ukuthi bahlanganyele loMongameli uMnangagwa kanye lesizwe sonke ekunanzeni amaqhawe alwela inkululeko.
“Ngakho-ke zonke izizalwane zeZimbabwe ziyamenywa ukuthi zihlanganyele loMhlonitshwa uMongameli, uCde Dr ED Mnangagwa, kanye lesizwe sonke ekunanzeni iHeroes Day ka-2026,” utsho njalo.
Ekhuluma ngomkhosi weDefence Forces Day, uDokotela Soda uthe umkhosi omkhulu uzakwenzelwa eRufaro Stadium eHarare ngaphansi kwesihloko esithi: “ZDF: Guaranteeing Peace and Stability for the Attainment of Vision 2030.”
Imikhosi yezabelo layo izaqhutshwa ezindaweni ezitshiyeneyo elizweni lonke. Njengenxenye yemikhosi yeminyaka yonke, amabutho eZimbabwe Defence Forces (ZDF) azaqhuba iviki lokuncedisa umphakathi kusukela mhlaka 27 kusiya ku-31 Ntulikazi, lapho okuzanikelwa khona amaphrojekithi athuthukisa imiphakathi, aqedwe ngokubambisana labanye ababambiqhaza.
Phakathi kwamaphrojekithi la kukhona iNikita Mangena Clinic eMwenezi eMasvingo, iWhunga Clinic eBeitbridge eMatabeleland South, ihofisi yeCivil Registry eBuhera eManicaland kanye leECD leICT Complex eHallingbury Primary School eMabelreign, eHarare.
Uhlelo lweDefence Forces Day luzagoqela inkulumo kaMongameli Mnangagwa, ongumLawuli Omkhulu wamabutho eZimbabwe Defence Forces, umbukiso wamabutho kanye lokutshengiswa kwemisebenzi eyehlukeneyo eyenziwa ngamabutho.
Kuzaphinda kube lemicimbi yokuzilibazisa lapho okuzacula khona abaculi abadumileyo bakuleli, abagoqela uSulumani Chimbetu, uJah Prayzah, uKona Ngale kanye leAir Power Band. Umkhosi lo uzaphetha ngomdlalo webhola lenyawo phakathi kweqembu elikhethwe kuZimbabwe Defence Forces leqembu elikhethwe kuNamibian Defence Forces.
IHeroes Day leDefence Forces Day ngeminye yemikhosi eqakatheke kakhulu eZimbabwe njengoba inanza ukuzinikela lokuzidela kwamaqhawe lamaqhawekazi alwela inkululeko, njalo isikhumbuza ngendima eqhutshwa ngamabutho eZimbabwe Defence Forces ekuvikeleni uzibuse, ukuthula kanye lokuvikela imingcele yelizwe.
